BE sanksione Kinës/Unioni, masa ndaj kompanive kineze që ndihmojnë Rusinë

Brukseli ka propozuar vendosjen e sanksioneve ndaj kompanive kineze që mbështesin makinën luftarake ruse, për herë të parë që nga nisja e agresionit në Ukrainë.

Të paktën 7 biznese kineze të akuzuara për shitje të pajisjeve që mund të përdoren në armatime janë listuar në një paketë të re sanksionesh që do të diskutohet nga shtetet anëtare të BE-së gjatë javës. Lëvizja ka gjasa të zemërojë Pekinin, i cili është i prirur të mbajë Brukselin larg rreshtimit përkrah Uashingtonit në betejën e tyre për influencë globale.

Deri më sot, Brukseli ka shmangur sanksionimin e Kinës, me argumentin se nuk ka pasur prova që të sugjeronin furnizimin me armë të Moskës. Sidoqoftë, lista e sanksioneve ka nevojë për një aprovim unanim nga 27 vendet anëtare përpara se të hyjë në fuqi.

Dy kompani kineze që ndodhen në listë, aktive në prodhimin e qarqeve gjysmëpërçuese, ndodhen prej kohësh të sanksionuara nga administrata amerikane. Brukseli po propozon gjithashtu sanksionimin e disa prej kompanive iraniane të përfshira në prodhimin dhe furnizimin me avionë të telekomanduar Rusisë.

Në përgjithësi, BE po përpiqet të frenojë shmangien e sanksioneve nga kompanitë ushtarake dhe ato teknologjike.

Drafti përfshin masa që do t’i lejojnë Unionit të kufizojë shitjen e produkteve të caktuara vendeve të treta nëse presioni diplomatik nuk ndryshon qasjen e tyre.

LEXONI GJITHASHTU:

• Sherr mes disa personave në Dibër, qëllohet punonjësi i Kadastrës. 2 të proceduar
• Ashpërsohet fushata në Turqi, sulmohet autobusi i fushatës së opozitës