“Kosova të mos humbasë aleatët”, diplomati: S’duhet të bëhemi pre e provokimeve

Diplomati Blerim Canaj tha se Kosova është një shtet i cili ekziston falë partnerëve strategjikë ndaj duhet të bëjë kujdes të mos i humbasë aleatët.

Canaj tha në një intervistë për Euronews Albania se Kosova është këshilluar nga aleatët që të mos binte “pre” e provokime, pra sipas tij, provokimet nga ana serbe ishin të pritshme ndërsa ne nuk duhet të gabonim.

Ai tha se tensionimi i situatës në veri në këtë kohë kur Bashkimi Europian po përpiqet të tërheqë Serbinë nga ndikimi i Rusisë është i rrezikshëm për shtetin e Kosovës, pasi po kundërshton aleatët.

“Kur ne mendojmë se presioni ndërkombëtar ka pasur një ndikim aq të madh në Austri sa të tërhiqet një kancelar, atëherë kush jemi ne? Tek e fundit ne jemi krijuar dhe ekzistojmë gjithmonë falë përkrahjes së partnerëve tanë strategjik. Nëse ne i humbim ata cili do jetë partneri ynë strategjik i ardhshëm?

Çfarë është më e rëndësishme për mua është pyetja se gjatë gjithë kohës ne kemi pasur këshilla të mos biem në provokime të tensionimit të situatë në veri pasi kjo do ndihmonte Rusinë dhe Serbinë. Provokimet e Serbisë kanë qenë të pritshme. Atëherë kë po ndihmojmë ne? Pse po biem pre e këtyre provokimeve?”-tha Blerim Canaj.

LEXONI GJITHASHTU:

• “Dënoj aktet e dhunës”, Bardhi reagon për përplasjet pas mbledhjes së kryesisë së PD
• Escobar: Vuçiç do ndikojë për t’i bindur serbët të marrin pjesë në zgjedhje