Ujërat e zeza derdhen në det, ndotja nga hidrokarburet mbyll impiantin në Durrës

Në një kohë kur Durrësi pritet të regjistrojë rekord turistësh për këtë sezon veror, afro 30 mijë metra kub ujëra të ndotur, që dalin nga banesat dhe bizneset e qytetit në një ditë, tashmë do të derdhen në det pa u filtruar.

Një situatë e tillë vjen pas ndotjes së krijuar në impiantin e trajtimit të ujërave të zeza në Shënavlash.

Atje mbetjet e hidrokarbureve në sasi të konsiderueshme kanë shkaktuar një nga ndotjet më të mëdha.

 “Flasim për mbetje jo të rregullta. Kemi të bëjmë me një situatë jashtëzakonisht të nderë, si për mjedisin dhe jemi para një fakti që impakti kryesor shkon në mjedis por edhe në popullsi, pa përmendur se dëmtimi i impianit është një kosto shumë e madhe”,- Olsi Gracen,  drejtor i impiantit të trajtimit

Mbetjet mendohet se mund të jenë hedhur në pakujdesi e sipër nga ndonjë biznes dhe më pas kanë lëvizur nëpërmjet kanalizimeve të ujërave të ndotura të qytetit, duke përfunduar tek impianti i trajtimit.

 “Për të shmangur dëmtimin e rëndë të këtij impianti është bërë ndërprerja e punës në të, ndërsa kanë nisur hetimet për të zbuluar autorët,”-tha gazetarja e Euronews Albania Kloida Gjuzi.

Për këtë qëllim, drejtuesit kanë njoftuar Inspektoriatin Kombëtar të Mbrojtjes së Territorit, Agjencinë Kombëtare të Mjedisit, si dhe Policinë e Shtetit.

LEXONI GJITHASHTU:

• Dëmtohen 50 hektarë grurë, stuhia në Korçë prish kulturat e mbjella
• Kurti viziton familjet e tre policëve të rrëmbyer nga serbët, zbardhet biseda