Bie interesi i njerëzve për të lexuar lajme, studimi paraqet shifrat

Numri i njerëzve që kanë interes të madh për lajmet ka rënë me rreth një të katërtën në gjashtë vitet e fundit. Shifrat i referohen një raporti nga Instituti Reuters i Universitetit të Oksfordit, ku thuhet se në vitin 2023 rreth 48% e njerëzve në mbarë botën janë shumë ose jashtëzakonisht të interesuar për lajmet nga 63% që ishin në vitin 2017.

Më shumë se një e treta e njerëzve (36%) në mbarë botën thonë se ndonjëherë ose shpesh i shmangin në mënyrë aktive lajmet.

Autorët e raportit thanë se sipas studimit, audienca vazhdon që të shmangë lajme të rëndësishme që kanë lidhje me luftën në Ukrainë, krizën e kostos së jetesës si dhe lajmet dëshpëruese, pasi kërkojnë që të mbrojnë shëndetin e tyre mendor.

Raporti i Lajmeve Digjitale 2023 doli në përfundim gjithashtu se audienca e televizionit tradicional dhe medias së shtypur po vazhdon të bjerë, ndërkohë që konsumatorët në internet po lexojnë lajmet më pak se vitet e shkuara dhe po bëhen më pak të interesuar.

Aktualisht në Mbretërinë e Bashkuar, 41% e 18-24-vjeçarëve thonë se mediat sociale janë burimi kryesor i lajmeve të tyre (43% në të gjitha vendet), nga 18% që ishte në vitin 2015.

TikTok dhe Instagram kanë parë rritje të përdorimit. Instagram tani është një burim lajmesh për 14% të njerëzve, me TikTok në 6%.

LEXONI GJITHASHTU:

• Rusia paralajmëron marrëveshje tregtare me Iranin
• “Serbia kundër dhunës”, qytetarët paralajmërojnë radikalizimin e protestave