Të bashkëjetosh me ujërat e zeza, rrezik infeksioni për qindra familje në Durrës

Ky kanal përshkon mes për mes rrugën “Vala e detit” në Shënavlash të Durrësit.

Atje, prej më shumë se 25 vitesh, “vala” e ujërave të zeza, që derdhen përgjatë gjithë gjatësisë së tij dhe mbetjet urbane të shpërndara gjithandej po ua bëjnë jetesën të vështirë banorëve.

 “Na shqetëson aroma se të gjithë ujërat e zeza këtu vijnë. Miza, mushkonja, të gjitha të këqijat i kemi nga era e keqe”,-tha një banor.

Rrugët përkrah tij janë të vetmet ku mund të kalojnë banorët, duke u kthyer kështu në një kërcënim serioz për shëndetin e tyre.

“Dalim, i shoqërojmë kalamajtë. S’kemi ç’bëjmë, ku të shkojmë, fëmijë është ai do të dalë të luajë”,-tha banori i zonës.

Sipas banorëve edhe institucioni i bashkisë është në dijeni të rastit.

 “Normale që e dinë, se kanë ardhur e kanë verifikuar edhe vetë. Ata kanë kaluar në këtë rrugë, e dijnë shumë mirë si vjen era, po ishalla u mbushet mendja e vënë dorë”,-tha një grua.

Ndërsa në zonë po punohet për rikonstruksionin e rrugës ne iu drejtuam bashkisë së qytetit, për të mësuar nëse është duke u procesuar ndonjë projekt edhe për rehabilitimin e kanalit.

Në përgjigjen e saj bashkia thekson se punimet po kryhen nga Fondi Shqiptar i Zhvillimit dhe më vonë do të shihet mundësia e mbylljes a rehabilitimit të kanalit.

LEXONI GJITHASHTU:

• Gjermanët ‘dashurohen’ me Korçën, të kënaqur me mikpritjen, ushqimin e çmimet
• Basha në krah të delagacionit ukrainas në KiE: Rusia të paguajë dëmet e luftës