“Mos u bëni mish për top”, Balla: Studentët e mjekësisë që s’firmosin të paguajnë

Kreu i grupit parlamentar të Partisë Socialiste, Taulant Balla tha gjatë fjalës së tij në Kuvend se studentët e mjekësisë do të tërheqin diplomën pas përmbushjes së detyrimit për punësim.

Sipas tij, për gjithë ata që nuk pranojnë zgjidhja është e thjeshtë.

“Gjithçka është parashikuar. Ata që nuk pranojnë ta nënshkruajnë këtë marrëveshje, është shumë e thjeshtë, do të paguajnë detyrimin, shumë e thjeshtë sepse është investim publik dhe duhet t’i shërbejnë qytetarëve shqiptarë. Prandaj ju nuk keni për ta gjetur kurrë rrugën,” – u shpreh Balla.

Ai kujtoi se si kanë dalë kundër në çdo projekt që ka nisur mazhoranca dhe sot është vërtetuar se kanë qenë gabim.

“Mos u bëni mish për top në një gjë që i bën mirë një interesi publik. Mos harroni, jeni këtu në këtë sallë për interesin e madh kombëtar të shqiptarëve, ajo pjesë e shqiptarëve që ju ka sjellë këtu,” – u shpreh Balla.

Projektligji për punësimin e detyruar të studentëve të mjekësisë ka kaluar me procedurë të përshpejtuar në Parlament me 64 vota pro dhe 24 kundër.

LEXONI GJITHASHTU:

• Çfarë parashikon projektligji për studentët e mjekësisë, kontrata që do të firmosin
• Rama: Studentët e mjekësisë, 5 vite në shërbim të popullit që të marrin diplomën