Humbi në zgjedhjet lokale, reagon kandidati i opozitës në Rrogozhinë

Kandidati i koalicionit Bashkë Fitojmë, për bashkinë e Rrogozhinës, Shkëlqim Hoxha, ka reaguar për herë të parë pas humbjes në zgjedhjet pjesore lokale të mbajtura të dielën.

Përmes një postimi në facebook, Hoxha shpreh mirënjohjem për të gjithë banorët e Rrogozhinës të cilët e mbështetën dhe morën pjesë në votime.

Hoxha thekson se zgjedhjet e 23 korrikut u manipuluan dhe përmes shantazhit e presioneve u arritën të fitohen nga Partia Socialiste.

“Mirënjohje dhe falenderime për të gjithë banorët e Rrogozhinës që dolën për të votuar. Falenderime të përzemërta për të gjithë ata që besuan tek ëndrra e ekipit tonë për një Rrogozhinë ndryshe.

Falenderime për gjithë bashkëpuntorët dhe njerëzit që sakrifikuan këto muaj kohë, energji dhe mund. Faleminderit edhe atyre që vendosën të “ndërronin anijen” gjatë rrugës! Kjo periudhë rezultoi një eksperiencë unike dhe shumë mësime u nxorrën.

Rezultati i zgjedhjeve të 23 Korrikut për fat të keq nuk pasqyron realitetin dhe nuk është një shprehje e vullnetit të lirë të qytetarëve. Ky rezultat u ndikua nga një makineri shantazhi dhe dhune ndaj administratës publike, biznesit dhe qytetarëve. I gjithë shteti zbarkoi në Rrogozhinë dhe sollën me vete një paketë me mbi 1500 vota.

Përballë patëm shtetin, oligarkët dhe makineritë tyre. Unë dhe njerëzit fisnikë që më rrethonin nuk u trembëm, nuk bëmë kompromise dhe nuk u përkulëm ndaj tyre, por luftuam deri në momentin e fundit për të mbrojtur vullnetin e qytetarëve të Rrogozhinës.

Votat i mbrojtëm dhe vota përsëri morëm! 4920 qytetarë përqafuan dëshirën tonë për Rrogozhinën një qytet më të mirë! 4920 falenderime të sinqerta për të gjithë ju që besoni në dinjitet dhe vlera njerëzore”, shkruan Hoxha.

LEXONI GJITHASHTU:

• Fitoi bindshëm Rrogozhinën, Memolla: Do ta kthejmë në një qytet elitar për turizëm
• Përfundon procesi i numërimit në Rrogozhinë, fiton kandidatit i Partisë Socialiste