Partizani kërkon play off-in, përballet sot me kampionët e Letonisë

Partizani do të luaj sonte ndeshjen e parë eleminatore të raundit të tretë kualifikues për në Uefa Conference League. Kampionët e Shqipërisë, pasi kaluan me sukses Escalades në raundin e dytë të Conference League, do të sfidojnë kampionët e Letonisë me objektivin e vetëm për t’u kualifikuar në play off-in e këtij kompeticioni.

Në këtë ndeshje të parë të kuqtë e drejtuar nga trajneri Zoran Zekiç do të kërkojnë së paku të mos dalin me humbje, që më pas t’i lënë kartat e hapura për ndeshjen e kthimit në Shqipëri. Sfida e dytë e këtij turi do të luhet në datë 17 gusht dhe është planifikuar për t’u zhvilluar në “Elbasan Arena”.

Ndërkohë, sa i përket formacionit trajneri kroat duket se e ka të plotë ekipin. I vetmi shqetësim ka qenë gjendja e mbrojtësit të krahut, Andi Hadroj, i cili duket se i ka tejkaluar problemet dhe gjatë dy ditëve të qëndrimit në Letoni është stërvitur me grupin dhe pritet të jetë titullar mbrëmjen e kësaj të enjte.

Nëse Partizani ia del që të kaloj edhe këtë raund në kupat e Europës në play off-in e Conference League do të gjente fituesin e çiftit mes Astana dhe Ludogoretes.

Ndërkohë mbrëmjen e kësaj të enjte në fushë do të zbresin edhe dy ekipet e tjera shqiptare, Ballkani që luan ndaj Lincoln dhe Struga që sfidon Hesperenge.

LEXONI GJITHASHTU:

• “Duam të shkojmë në Euro 2024”, Silvinjo flet për objektivat e kuqezinjve në shtator
• Harry Kane një hap larg Bayernit, kur mund të finalizohet marrëveshja