Më pak lindje| 10.284 bebe në 6 muaj, 12% më pak se vitin e kaluar

Numri i bebeve të lindura në pjesën e parë të vitit ishte 10 284. Shifrat flasin për një rënie me 12% në krahasimin me periudhën janar-qershor 2022.

Numri i bebeve të lindura në Shqipëri në pjesën e parë të vitit 2023 ishte 10 284. Krahasuar me gjysmën e parë të vitit 2022, numri është 12% më i vogël, çka flet për një nivel më të ulët në ritmin e rritjes së popullsisë.

Shifrat e nxjerra nga INSTAT tregojnë se shtesa është pozitive në periudhën janar-qershor, pasi numri i vdekjeve rezulton më i ulët me diferencë 73.

Sipas qarqeve, Tirana, Lezha, Dibra, Kukësi dhe Durrësi kanë regjistruar më shumë lindje se vdekje, ndërsa në pjesën tjetër të vendit rezulton e kundërta, ku Berati ka parë përkeqësimin më të madh statistikor me 20% më pak lindje se vitin e kaluar.

Kjo strukturë popullsie po krijon sfida të reja për shtetin, pasi nga ana tjetër po shtohet numri i personave mbi 60 vjeç.

Të dhënat e INSTAT tregojnë se me 1 janar 2023 popullsia mbi 60 vjeç ishte sa një e katërta e totalit të popullsisë.

Personat mbi 60 përbënin 23.5% të totalit të popullsisë me një rritje 1 pikë përqindje në krahasim me vitin 2022 dhe me rritje 8.8 pikë për qind që nga viti 2011 kur u krye Censi i fundit për popullsinë.

LEXONI GJITHASHTU:

• Shtohet popullsia, INSTAT: 456 lindje më shumë se vdekje në 3 muajt e fundit
• INSTAT: Rritet me 33% numri i të huajve që vizitojnë Shqipërinë