Berisha mbledh deputetët, jep direktivat për “përballjen” me qeverinë në parlament

Ish-kryeministri Sali Berisha zhvilloi këtë të premte një mbledhje me grupin parlamentar të PD-së në kuadër të strategjisë së opozitës për t’u përballur me mazhorancën gjatë sesionit të ri parlamentar që pritet të nis më 4 shtator.

Berisha në fjalën e tij theksoi se parlamenti është në funksion të kryeministrit Rama dhe grupeve kriminale. Ndaj ai theksoi se Rithemelimi do të shumëfishojë përpjekjet dhe denoncimet për të përballur me atë që ai e cilësoi si regjimi i kryeministrit Rama.

“E nisim këtë sesion paralamentar, në sesionin e betejave më të fuqishme kundër këtij rregjimi të damkosur në shkallë maksimale, në rrafshin kombëtar dhe ndërkombëtar.

Unë e kuptoj që për mënyrën si funksionon parlamenti, ai funksionon si një parlament cubash, hajdutësh dhe njerëz që nuk kanë, nuk njohin as ligj, as moral, as kushtetutë, as rregullore. Institucioni në të cilin të drejtat e deputetëve dhe për rrjedhojë të atyre që përfaqësojnë deputetët, shkelmohen çdo orë, çdo ditë. Parlament i cili është totalisht në  funksion të regjimit të Edi Ramës, regjimit të krimit, drogës dhe vjedhjeve.

Parë në këtë kontekst, është tmerrësisht e vështirë ulja në atë sallë, por detyrime më supreme ndaj zgjedhësve tanë, na detyrojnë ne që jo vetëm që të ulemi, por të shumëfishojmë përkushtimin tonë, të shumëfishojmë alternativën tonë për qytetarët shqiptarë dhe denoncimet në të gjitha drejtimet të këtij regjimi që kryesohet nga një njeri, sot më i diskredituari në Ballkan dhe Europë, pas Putinit dhe Lukashenkos”, tha Berisha.

LEXONI GJITHASHTU:

• Koncesioni i sterilizimit, Berisha sulmon SPAK: Nuk hetoi zyrtarët e lartë
• “SPAK instrument i Ramës”, Berisha: Të ngrihemi në protestat më fuqishme ndonjëherë
• Berisha: Shoqëria është në prag vetëvrasje, sot shqiptarët janë në duart e krimit