Petkoviç mohon se Radoiçiç gjendet në spitalin ushtarak në Beograd

Drejtori i Zyrës për Kosovën në Qeverinë Serbe, Petar Petkoviç, hodhi poshtë pretendimet e bëra nga ministri për Punë të Brendshme i Kosovës, Xhelal Sveçla, se nënkryetari i Listës Serbe, Millan Radoiçiç, gjendet në spitalin ushtarak në Beograd.

“Sveçla gënjeu se Millan Radoiçiç është shtruar në spitalin ushtarak në Beograd”, tha Petkoviç përmes një deklarate më 27 shtator.

Një ditë më herët, ministri Sveçla gjatë një interviste për Euronews Albania deklaroi se Radoiçiç, i cili ai tha se ishte udhëheqës dhe pjesëmarrës në sulmin ndaj Policisë së Kosovës më 24 shtator në Banjskë të Zveçanit, “ka shumë gjasa që është në spitalin në spitalit ushtarak në Beograd”.

Radoiçiç është nënkryetar i Listës Serbe, partisë më të madhe të serbëve në Kosovë që gëzon mbështetjen e Beogradit zyrtar.

Më 26 shtator, Sveçla publikoi një video të incizuar me dron, që tha se shfaq Radoiçiçin e armatosur duke qëndruar në manastirin në Banjskë me një grup personash të armatosur dhe të veshur me uniforma ushtarake.

LEXONI GJITHASHTU:

• Daçiç merr në mbrojtje Radoiçiçin: Video nuk është bërë ditën që ndodhi sulmi
• Deputeti: Radoiçiç, biznes ilegal me vlerë 800 milionë euro në Kosovë