Pamje Ekskluzive nga Euronews Albania. Raketat mbi qytetin Ashkalon në Izrael

Euronews Albania ka siguruar me video momentin kur raketat e grupit militant të Hamasit, sulmojnë qytetin e Ashkelon, në afërsi të Rripit të Gazës.

Në video dëgjohen sirenat e alarmit të luftës, ndërkohë që në qiell shihen qartë raketat e Hamasit teksa shkatërrohen nga “kupola e hekurt” e Izraelit.

Sistemi i mbrojtjes antiraketore të izraelit aktivizohet menjëherë sa raketat tentojnë të godasin objektivat në Ashkelon.

Gazetari Thimi Samarxhiu, i cili së bashku me operatorin, Olti Allmeta, ndodhen në qytetin pranë rripit të Gazas, kanë vrapuar për tek dhomat e blinduara, për arsye të sigurisë.

E gjithë skena ndodhi teksa gazetari i Euronews Albania, po raportonte livë për Euronews Romania.

“Alarmi po bie! Po bie alarmi! Duhet të largohemi. Duhet të futemi këtu (në dhomën e sigurisë). Gjithandej po dëgjohen sirenat e alarmit”, tha gazetari Samarxhiu ndërkohë që nxitonte të futej në një dhomë të sigurt. Hamasi po sulmon me raketa! Ne jemi rreth 500 metra larg prej zonës ku u hodh raketa”- dëgjohet duke thënë gazetari.

Më 7 tetor, Izraeli u përball me sulmin më të madh të kryer viteve të fundit nga militantët palestinezë të Hamasit, të cilët sulmuan këtë shtet nga toka, ajri dhe deti. Izraeli u përgjigj me bombardime në Gazë, vendbanim i 2.2 milionë palestinezëve.

Për shkak të dhunës, qindra persona janë vrarë në Izrael dhe Gazë.

Kujtojmë se Izraeli parlajmëroi banorët e Gazas këtë të premte të zhvendosen nga veriu në jug, pasi në orët në vijim pritet të nis dhe ofensiva ushtarake e këmbësorisë.

Janë 1.1 milionë banorë të cilët pritet të zhvendosen, teksa përballen me mungesën e energjisë elektrike, karburantit dhe sasi të kufizuara ushqimesh.

Banorët e Gazës janë fotografuar duke bërë paketimet dhe duke u përpjekur të lëvizin drejt zonave të sigurta.

Nga ana tjetër Hamasi u ka bërë thirrje popullatës civile që t’i injorojnë thirrjet e izraelit dhe të mos zhvendosen në jug.

LEXONI GJITHASHTU: 

• Human Rights Watch thirrje Izraelit: Ndalni përdorimin e fosforit të bardhë në Gazë
• Lufta në Izrael/ Ministria e Jashtme: Po punojmë për riatdhesimin e shqiptarëve