Qëlloi me sëpatë të riun në mes të lokalit, kush është autori i ngjarjes në Kavajë

Një konflikt për motive të dobta ka përfunduar në përdorimin e sëpatës në Kavajë.

Ngjarja e rëndë është regjistruar në lokalin në pronësi të Elton Dedej, ku 52-vjeçari Artur Petja ka goditur me sëpatë në kokë 33-vjeçarin e identifikuar me inicialet I.GJ.

Ky i fundit, pas mjekimit në spitalin e Durrësit, është dërguar për mjekim të specializuar në spitalin e Traumës në Tiranë, në gjendje kritike për jetën, ndërsa autori është vënë në pranga për veprën penale “Vrasja me dashje”, mbetur në tentativë.

I arrestuar është edhe pronari i lokalit, pasi ka përkrahur 52-vjeçarin, duke prishur vendin e ngjarjes dhe duke dhënë deklaratë të rreme.

Sipas burimeve, kur është marrë në pyetje, ai ka deklaruar se i plagosuri ishte rrëzuar nga shkallët.

Të njejtat burime thonë për Euronews Albania, se Dedej nuk është një emër i panjohur për blutë e Kavajës, pasi rezulton me precedent të mëparshëm penal në fushën e krimeve kundër personit.

44-vjeçari është përfshirë në një përplasje me armë më 4 korrik 2019 në lokalin e tij, mes dy bandave, ku si pasojë mbeti i vrarë një kalimtar i rastit.

Ai akuzohet gjithashtu edhe për aktivitetin e lojërave të fatit, pasi në lokalin e tij është gjetur edhe një klient i identifikuar me inicialet A.D., 31 vjeç, në celularin e të cilit ishin gjetur të hapura faqe që shërbejnë për lojëra fati.

Mjeti prerës (sëpatë), celulari i pronarit të lokalit dhe i shtetasit A. D. janë sekuestruar në cilësinë e provës materiale.

LEXONI GJITHASHTU:

• Të shtëna me armë në Laknas, një i vdekur dhe një i plagosur
• Tentoi të vriste me sëpatë një 33-vjeçar, arrestohet autori dhe bashkëpunëtori i tij