Futbollist shqiptar në akademinë e PSG. Anersi Vaka rrëfen ëndrrën e tij…

Të luash në një skuadër evropiane është ëndrra e çdo të riu shqiptar që është rritur me pasionin për futbollin. Njëri prej tyre është Anersi Vaka, i cili është pjesë akademisë së PSG, në Francë, një ndër shkollat më të mira të futbollit në Evropë.

“Luaj me PSG në Francë, me moshat 18, prej fillimit të këtij viti. Ishte një ëndërr që e kam pasur që i  vogël. Synimi im i parë është që të luaj me moshat 19, sepse është mosha ku duket nëse një futbollist do ketë të ardhme apo jo”,-tha Anersi Vaka, futbollist.

17-vjeçari qëndroi për disa ditë në kryeqytet, aty ku po zhvillohen seleksionimet për skuadrat zinxhir të kombëtares. Falë kualiteteve të tij si sulmues, arriti të shkëlqente në paraqitjen testuese të tij.

“Unë për vete luajta pardje, bëra një ndeshje për një orë. Shënova një gol. Unë jam i lumtur për paraqitjen time, por e mira nuk ka fund”,-tha Anersi Vaka, futbollist.

Ashtu si çdo futbollist, synimi i Anersin është kombëtarja A, një ëndërr fëmijërie.

“Ëndrra e madhe është që luaj me kombëtaren A. Si çdo futbollist shqiptar ëndrra jonë është të luajmë me kombëtaren,  do jetë emocion i papërshkrueshëm”,-tha Vaka.

Anersi Vaka është pjesë e PSG U-18, i afruar në këtë ekip si një golashënues dhe lojtar premtues për të ardhmen e kësaj skuadre.

LEXONI GJITHASHTU:

• Arsenali 5 pikë para vendit të dytë. Në mbrëmje përballja, Man Utd-Chelsea
• “Dëshiroja kthimin në Barcelonë”- Lionel Messi flet për transferimin në SHBA