Në 2022 rritja e pagës reale më e ulët se shtrenjtimi i çmimeve

Paga mesatare mujore bruto u rrit me 8.2% vitin e kaluar, por teksa niveli I inflacionit ishte 6.7%, rritja reale në rang vendi ishte në fakt vetëm 1.5%

Sipas të dhënave të INSTAT, nga 12 qarqe, 9 prej tyre u janë rritur pagat më pak se vlera e shtrenjtimit të shportës së konsumit, duke implikuar kështu që në fakt paga reale ka pësuar rënie krahasimisht me vitin 2021.

Presionet mbi tregun e punës duket se nuk kanë pasur efekt tek ndryshimi i pagave, që në shumicën e qarqeve të vendit kanë pasqyruar vlera të ulëta ndryshimi.

Rënie më të madhe ka pasur qarku i Kukësit, ku pagat u rritën vetëm 2.7% por krahasuar me impaktin e inflacionit të lartë, ato zbritën me 4%.

Rritje reale të pagave pësuan vetëm qarqet e Tiranës dhe Durrësit, ku pagesa mesatare u rrit përkatësisht me 11 dhe 9 % dhe krahasimisht me inflacionin, në Durrës për 2022 u rrit vetëm me 4.3% dhe në Tiranë 2.3%.

Paga mesatare në rang vendi për vitin e kaluar ishte 61.898 lekë. Qarku i Tiranës renditet i pari në vend për pagesa më të larta, mesatarisht prej 69.743 lekë.

Ndërkohë, Shkodra dhe Lezha kishin rrogat më të ulëta afërsisht 49.223 lekë dhe 49.711 lekë.

LEXONI GJITHASHTU:

• Rriten dyfish pagat dhe shpërblimet për deputetët, sa u shkojnë të ardhurat në muaj
• Pse shteti rrit pagat dhe jo pensionet? Ja sqarimi që jep Rama