Grabitet shtëpia e futbollistit të njohur, autorët marrin 1.1 mln euro

Banesat e futbollistëve të njohur vijojnë të jenë në shënjestrën e grabitësve, teksa e radhës ishte ajo e sulmuesit të Manchester Cityt, Jack Grealish. Ky i fundit jeton në një vilë luksoze në Cheshire së bashku me familjen e tij, ku vlera e saj shkon në mbi 6 milionë euro. E mërkura ishte një ditë e suksesshme për të në punë, ku Manchester City mposhti Evertonin, por jo sa i përket familjarëve të tij, që kaluan momente tmerri.

Mbrëmjen e së mërkurës, kur futbollisti britanik ishte në lojë, persona të maskuar kanë hyrë në territorin e banesës së tij dhe kanë kryer grabitje. Në ato momente brenda saj ishin familjarët, por fatmirësisht nuk pati të lënduar, për faktin se nuk u ndeshën me autorët. Sipas asaj që raportojnë mediat britanike, lojtari u lajmërua për ngjarjen menjëherë sapo ndeshja përfundoi dhe u detyrua të largohej me shpejtësi nga stadiumi.

Në vilën e tij, autorët morën sende me vlerë konkretisht ora të shtrenjta dhe bizhuteri, ku në deklaratat e bëra në polici, familjarët e futbollistit pohuan se ato kapnin vlerën e 1.1 milionë eurove. Ata dëgjuan zhurmën dhe qentë që lehnin e në këtë moment shtypën butonin e alarmit, ndërsa policia arriti në kohë rekord, por pa mundur të bjerë në gjurmët e autorëve edhe pse në dispozicion u vendos dhe helikopteri.

LEXONI GJITHASHTU:

• FOTO| Mjeti me të cilin lëvizën autorët e grabitjes në Kamëz
• Grabitje me armë zjarri në Kosovë, plagoset një efektiv policie