Kakavijë, policia kufitare masa për shmangien e radhëve në kufi

Pas përfundimit të festave të fundvitit në vendlindje bashkatdhetarët tanë që jetojnë dhe punojnë në Greqi nisin kthimin në shtetin fqinj. Gjatë periudhës së festave nëpërmjet doganës së Kakavijës hynë në vendin tonë mbi 55 mijë persona.

Në këto ditë të para të vitit 2024 Policia Kufitare në Gjirokastër është e angazhuar që gjatë rrugës së kthimit në Greqi emigrantët të mos ndeshin probleme në kufi. Për të evituar radhët e pritjes në sportelet e përpunimit të dokumenteve, Policia Kufitare në Kakavije do të bëjë të mundur shtimin e sporteleve në varësi të fluksit të lëvizjes.

Gjithashtu, janë zhvilluar takime me palën greke për të evituar problematikën e radhëve të pritjes në kufi. Në këto ditë të para të vitit të ri fluksi i lëvizjes në Kakavije ka qenë i ulët ndërsa pritet të rritet në ditët në vazhdim me kthimin e emigrantëve që jetojnë dhe punojnë në Greqi.

Masa shtesë janë marrë edhe nga Policia e Rendit për garantimin e sigurisë publike në mjediset e kësaj dogane ndërsa blutë e Qarkullimit Rrugor kanë përforcuar shërbimet në rrugën kombëtare Tepelenë- Gjirokastër- Kakavije për parandalimin e aksidenteve.

LEXONI GJITHASHTU:

• Arrestimet në doganën e Kakavijës, Gjykata jep masat e sigurisë
• Lejuan futjen e mallrave kontrabandë në Kakavijë, në pranga 2 doganierë, 4 në kërkim