Gjykata s’e lejoi të betohet, Beleri: E porositur nga Rama, po mban me forcë Himarën

Fredi Beleri ka reaguar pas vendimit të Apelit të GJKKO-së për të mos e lejuar për t’u betuar.

Përmes një postimi në rrjetet sociale Beleri shprehet se gjykata po zbaton urdhrin e kryeministrit duke u përpjekur që të mbajnë me forcën e pushtetit Himarën.

Më tej Beleri shprehet besimplotë në një vendim të Gjykatës Kushtetuese, që sipas tij duhet të mbrojë demokracinë dhe Kushtetutën.

“Sot Gjykata e porositur prej pushtetit politik , goditi edhe një herë zgjedhjet në Himarë. Gjashtë muaj pas kërkesës time, zbatoi urdhrin e kryeministrit – Gjyqtar Suprem , për mos të më dhënë leje për t’u betuar dhe të marrë mandatin. Pa betimin nuk behet efektiv mandati. Pa betimin dhunohet e drejta kushtetuese e zgjedhjeve. Duket sikur në Himarë nuk janë bërë zgjedhje. Me forcë pushteti, në kundërshtim me Kushtetutën, dhe me bekimin pa ligj të një gjykate personale të Kryeministrit, po shkelet çdo parim, normë kushtetuese dhe europiane për mos të lëshuar Bashkinë e Himarës… Gjithë vëmendja jone është tek Gjykata Kushtetuese. Atje kam depozituar disa kërkesa. Prej tre muajsh ka kaluar për gjykim ankimi im ndaj masës së sigurimit dhe akoma nuk ka një datë gjykimi. Presioni i Ramës qëndron i rëndë edhe atje. Presim që Gjykata Kushtetuese të paktën të mbrojë Demokracinë, të mbrojë Kushtetutën! Shpresa vdes e fundit, por dita ditës, këtij vendi po i vdes edhe shpresa!”, shprehet mes të tjerash Beleri.

LEXONI GJITHASHTU:

• Kërkoi leje të posaçme për t’u betuar, Apeli i GJKKO merr vendimin për Belerin
• Kishte kërkuar lirimin nga burgu, Apeli i GJKKO merr vendim për Fredi Belerin