Tatim mbi shfrytëzimin dhe jo çmimin, ligji i ri: Referencë për efekt tatimor

Numri i lartë i turistëve që vizituan vendin vitin e kaluar nuk përkon me të ardhurat e deklaruara nga hotelet dhe bujtinat. Si rrjedhojë ligji i ri për turizmin parashikon një referencë për tatueshmërinë e këtyre strukturave, të cilat do të paguajnë taksa mbi shfrytëzimin dhe jo në bazë të dhomave që posedojnë.

Hotelet dhe strukturat akomoduese do të tatohen në bazë të shfytëzimit të strukturave të tyre dhe jo në bazë të dhomave që posedojnë.

Në projektligjin për turizmin, janë vendosur disa shtesa për ndryshimin e tij, të cilat presin të miratohen në Kuvend.

Masa do të shërbej për të llogaritur sa tatime duhet të paguajnë këto struktura dhe për të luftuar informalitetin e lartë. Drafti kështu parashikon vendosjen e një reference në bazë të shfrytëzimit, dhe jo më mbi çmimin e dhomës.

Këshilli I Ministrave do të përcaktoj për periudha të ndryshme se s do të jetë kapaciteti minimal I shfrytëzimit për periudha të caktura.

“Sipërmarrësi turistik ka detyrimin të deklarojë kapacitetin e shfrytëzimit të strukturës akomoduese, i cili, për qëllime tatimore, nuk mund të jetë më i vogël se niveli minimal i shfrytëzimit. Këshilli i Ministrave, me propozimin e ministrit përgjegjës për turizmin dhe të ministrit përgjegjës për financat, përcakton periudhën e shfrytëzimit dhe nivelin minimal të kapacitetit të shfrytëzimit për strukturat akomoduese”, thuhet në nenin 64, pika 7 e ndryshuar.

Për shembull një strukturë në bregdet e cila deklaron shfytëzim zero në muajn prill për efekt tatimor, ajo tashmë do të duhet të paguajë të paktën nivelin minimal të referuar me ligj, pavarsisht situatës së deklaruar.

Edhe pse ishin plotë, hotelet në lokalitetet kryesore turistike, deklaruan se po shfrytëzonin vetëm 50-60% të dhomave.

Në tetor të vitit të kaluar, Kryeministri Rama u shpreh se numri rekord i turistëve që vizituan vendin tonë nuk përkonte me të ardhurat e deklaruara nga këto struktura.

Gjithashtu edhe periudha e shfrytëzimit nuk është reale për shkak të numrit të lartë të turistëve që vizituan vendin gjatë periudhave jashtë sezonit tradicional turistik.

Së bashku me referencat, projektligji përcakton edhe masat ndëshkuese për të gjithë pronarët që nuk do të deklarojnë numrin e saktë të vizitorëve, netë-qëndrimeve dhe informacione të tjera, me një masë gjobe mbi 150 mijë lekë. Gjobë 100 mijë lekë do të kenë edhe ata që bëjnë deklarime të pasakta për të dhënat statistikore që cënojnë të dhënat mbi turizmin.

LEXONI GJITHASHTU:

• Rishikohet taksa e shitjes së pronës, ndryshojnë edhe çmimet referencë
• Çmimet 50% më lirë, italianët zgjedhin Shqipërinë për turizmin dentar