“Rithemelimi” në terren për protestën, Bardhi dhe Noka nisin takimet në Shkodër

Pas bashkimit me Rithemelimin, Gazment Bardhi krah Flamur Nokës ka nisur takimet me bazën. Në ndalesën e parë në qytetin e Shkodrës, i pyetur nga gazetarët nëse tashmë e njeh Sali Berishën si kryetar, Gazment Bardhi theksoi se respekton vendimin e shumicës së anëtarëve.

 “Kjo është e qartë në gjithë përgjigjet që kam dhënë. Sa kohë e kanë zgjedhur shumica e anëtarëve unë dhe cilido duhet të respektojë vullnetin e shumicës së anëtarëve të partisë”,-tha Gazmend Bardhi, kryetari i grupit parlamentar të PD

Për Bardhin procesi i bashkimit ka ndodhur, ndërsa për grupin e deputetëve të Bashës thotë se po ndjekin rrugën e gabuar, ndërsa bën edhe një ftesë për bashkim. Sipas tij çdo demokrat duhet të jetë në luftë me Edi Ramën dhe jo opozitën, ndërsa thotë se nëse zgjedhin rrugë tjetër nuk përfaqësojnë PD-në.

 “Bashkimi ka ndodhur. Ka një pjesë të vogël të demokratëve që janë ende në rrugë të gabuar. Nga Shkodra i ftoj ti bashkohen PD, ti bashkohen betejës kundër Edi Ramës. Rruga e tyre për të qenë përballë opozitës dhe jo përballë Ramës është rrugë e gabuar që nuk e ndihmon Shqipërinë dhe popullin opozitar”- u shpreh Gazmend Bardhi, kryetari i grupit parlamentar të PD.

Në turin e takimeve në Shkodër pati dhe nga ata që nuk e pritën shumë mirë ftesën e demokratëve.

Ky tur i takimeve me qytetarët për t’i bërë thirrje që të marrin pjesë në protestën e opozitës pas Shkodrës do vijojë edhe në qytete të tjera.

LEXONI GJITHASHTU:

• A do marrë pjesë PD në protestën e thirrur nga “Rithemelimi”? Përgjigjet Alibeaj
• “Do shikoni dy beteja”, Flamur Noka para gazetarëve: Sot protestojmë për demokracinë