Biznesmenit në Sarandë i lënë kallëpin e tritolit në derën e dyqanit

Një sasi tritoli është gjetur përpara ambienteve të një biznesi në qytetin e Sarandës.

Lënda plasëse është gjetur e pa shpërthyer në portën e nje sipërmarrjeje që merrej me organizimin e eventeve.

Siç shihet dhe nga fotoja e siguruar nga Euronews Albania, kallëpi tritoli është i lidhur me një fitil dhe i ngjitur me ngjitës.

Policia dhe grupi hetimor po vijojnë punën për zbardhjen e rrethanave të ngjarjes dhe identifikimin e autorëve.

Nuk dihet ende nëse lënda eksplozive nuk ka mundur të shpërthejë apo nëse kemi të bëjmë me një formë kërcënimi për pronarin e biznesit, shtetasin Ilia Thano.

“Sot, rreth orës 08:20, në lagjen nr. 2, Sarandë, në derën e jashtme të një dyqani në pronësi të shtetasit I. Th., është konstatuar një kallëp me lëndë të dyshuar plasëse.

Grupi hetimor vijon veprimet për sqarimin e rrethanave të ngjarjes, identifikimin dhe kapjen e autorit/ëve”, thuhet në njoftimin e policisë.

LEXONI GJITHASHTU:

• Kush është noterja që i vendosën tritol në zyrën e saj në ish-Bllok
• I shpërthyen zyrën me tritol, flet noterja në Tiranë: Çfarë dyshoj