A është Shqipëria gati për në BE? Rama: Të ndërtojmë një shtet funksional

Kryeministri Edi Rama ka folur lidhur me integrimin e Shqipërisë në Bashkimin Europian.

Përmes një interviste për Euronews, Rama është shprehur se “bisedimet e anëtarësimit janë burimi më i jashtëzakonshëm i njohurive të shtet-ndërtimit që njerëzimi ka krijuar, falë BE-së”.

Rama tha gjithashtu se Shqipëria duhet të ndërtojë një shtet të ngjashëm me anëtarët e tjerë të BE-së, me sundim të ligjit dhe demokraci, me qëllim që të bëhet pjesë e unionit.

“Tani, ne duhet ta përdorim këtë transferim të njohurive në mënyrën më të mirë të tij për të ndërtuar këtu një shtet të ngjashëm me anëtarët, një shtet demokratik, një shtet funksional me qeverisje të mirë dhe sundim të ligjit. Dhe pastaj ne do të bashkohemi, me shpresë”, tha më tej Rama.

Që nga themelimi i tij në 1957, BE është zgjeruar shtatë herë, me Kroacinë që është shtesa më e fundit në 2013.

Shqipëria është një nga nëntë vendet që tentojnë të anëtarësohen në BE. Për t’u bërë një vend anëtar i BE-së, çdo vend kandidat duhet të plotësojë një sërë kërkesash strikte. Procesi i anëtarësimit përbëhet nga tre faza kryesore që kërkojnë miratim nga të 27 vendet e BE-së.

Shqipëria aplikoi për në BE në prill 2009 dhe iu dha statusi i vendit kandidat pesë vjet më vonë, në 2014 dhe ky shënoi hapin e parë drejt anëtarësimit.

Në vitin 2022, Shqipëria kaloi në fazën e dytë dhe filloi procesin e negociatave me Komisionin Evropian.

LEXONI GJITHASHTU:

• Ligji për zonat e mbrojtura/ Rama: 100% dakord me BE, vizioni Shqipëria 2030
• Shqiptari nga Australia: Berisha dhe Rama duhet të shkojnë në Mars, ja arsyeja