Fshati në Gramsh pa shkollë, 10 nxënësit e vetëm udhëtojnë 2 km për të mësuar

Fshati Cërrujë e Sipërme në Rrethin e Gramshit nuk mbahet mend të ketë pasur ndonjëherë shkollë 9-vjecare apo të mesme dhe kjo për shkak të numrit të pakët të nxënësve.

Aktualisht 10 fëmijë të fshatit detyrohen ta ndjekin shkollë në fshatin Drizë, 2 km larg vajtje-ardhje. Çdo ditë, veç lodhjes fizike, fëmijët rrezikohen edhe nga qarkullimi i automjeteve që lëvizin në aksin rrugor Gostimë-Gramsh. Fëmijët thonë se e ndjekin shkollën rregullisht, në ditë me shi e diell.

“Këtu nuk ka shkollë sepse kushtet nuk janë të mira dhe nxënës ka shumë pak. Rreth 10 veta jemi që shkojmë në Drizë për mësim. Kush ka mundësi i çojnë prindërit me makina, ndërsa të tjerët shkojnë në këmbë”, thotë një nxënës.

Agron Karaj, banor i fshatit thotë se në fshat s’ka pasur ndonjëherë shkollë, kjo për shkak të numrit të nxënësve.

“E kemi pasur midis dy fshatrave ne Drizë dhe atje shkonim të gjithë. E kemi kërkuar, por është numër i vogël dhe nuk ka mundësi të hapet”, shprehet ai.

Nga ky fshat janë larguar dhe po largohen me dhjetëra banorë, kryesisht të rinj. Fshati Cërrujë nuk është i vetmi në rrethin e Gramshit pa shkollë, pasi edhe në fshatra të tjerë shkollat janë mbyllur për shkak të numrit të pakët të nxënësve

LEXONI GJITHASHTU:

• Mollasi i braktisur/ Banorët e mbetur tregojnë se 80% janë larguar nga fshati
• Zjarr masiv në fshatin Gllavë të Memaliajt, rrezikohen banesat