Aksidenti me 8 viktima, prokurori: Po punojmë të zbulojmë përgjegjësitë, nëse ka

Prokurori i Gjirokastër, Petrit Çano, zbuloi detaje nga aksidenti i rëndë me 8 viktima që ndodhi mëngjesin e kësaj të marte në aksin rrugor Këlcyë-Përmet.

Çano tha se dyshohet se dejtuesi i mjetit është nga qyteti i Shkodrës, pasi makina rezulton e marrë me qira në këtë qytet.

Sa i përket 7 viktimave të tjerë ai tha se janë emigrantë të paligjshëm nga vendet e treta, për të cilët po punohet për identifikimine tyre.

“Vetëm drejtuesi i automjetit është nënshtetas shqiptar, i cili dyshohet të jetë nga qyteti i Shkodrës. Makina është marrë me qira në qytetin e Shkodrës, pra drejtuesi nuk është pronar i automjetit. Ndërkohë që viktimat e tjera janë nga vendet e tjera”, tha prokurori.

Prokurori theksoi se grupi hetimor po punon për të gjetur shkaqet e aksidentit dhe përgjegjësitë nëse ka të tilla.

“Do bëhet me kujdes këqyrja e të gjitha kufomave, identifikimi i tyre, pastaj në bashkëpunim me të gjitha strukturat e tjera do kryhen të gjitha veprimet e nevojshme hetimore për të përcaktuar shkaqet pse ndodhi kjo ngjarje dhe përgjegjësitë nëse ka. Viktimat nuk i kemi identifikuar ende dhe nuk e dimë se cilat shtete i përkasin. Kur të identifikojmë viktimat do bashkëpunojmë me ambasadat përkatëse. Pasi të kryejmë të gjitha ekzaminimet e nevojshme, jemi duke pritur edhe mjekët ligjor nga Tirana që po vijnë për të kryer ekzaminimet për të përcaktuar shkakun e vdekjes së tyre. Po punojmë për të gjetur shkaqet e kësaj ngjarjeje dhe përgjegjësitë nëse ka të tilla”, tha prokurori.

LEXONI GJITHASHTU:

• “Policia u kërkoi të ndalonin”-Çipa jep detaje nga aksidenti me 8 viktima
• “2 trupa dyshohet se janë në makinën e shkrumbuar”-Kryetari i Bashkisë Këlcyrë
• Aksidenti me 8 viktima në Këlcyrë, Eksperti: Duhet analizuar shpejtësia dhe rruga