Leverkusen i pamposhtur: Thellon rekordin, 40 ndeshje pa humbje

Leverkuseni është skuadra e dytë finalist e kupës së Gjermanisë, kompeticion në të cilin do të përballet me Kaiserslautern. Skuadra e Xabi Alonsos dhuroi një tjetër performancë fantastike, duke shënuar plot 4 gola në portën e kundërshtarit e duke thelluar rekordin e ndeshjeve pa humbje. Plot 40 të tilla, duke u bërë skuadra e vetme në Evropë që nuk e njeh fjalën disfatë.

Ndeshja ndaj Dusseldorf ishte një dominim absolut me vendësit të cilët shënuan 3 gola që në fraksionin e parë. Fillimisht Frimpong e pas tij Adli e Wirtz, vulosën fraksionin e parë në shifrat 3-0. 15 minuta nga pjesa e dytë ishte sërish ylli 20-vjecar i mesfushës Florian Wirtz ai që i dërgoi shifrat në 4-0, duke vulosur kualifikimin e Leverkusen. Pjesë e sfidës u bë dhe Boniface i cili vjen pas një dëmtimi që e mbajti larg fushave për disa javë.

Në finalen e madhe Leverkusen sfidohet nga Kaiserslautern, ekipi i Bundesligës së Dytë gjermane. Kjo do të jetë përballja numër 8 mes dy skuadrave, me aspirinat të cilat numërojnë 5 fitore, 1 barazim dhe 1 fitore që i takon miqve. Leverkusen është 8 ndeshje larg rekordit historik të Benfikës e cila në vitet 63-65 arriti të regjistronte 48 përballje dhe asnjë humbje mes tyre.

LEXONI GJITHASHTU:

• Bayern mposhtet në “Allianz Arena”, çfarë po ndodh në Bundesligë
• Gjeorgjia thyen Greqinë, kualifikim historik në Europian. Kompletohet Euro 2024