“Ka dosjet kriminale”- Eksperti zbulon sa ka kushtuar sistemi TIMS: Dhuratë nga SHBA

Avendir Peka, ekspert i sigurisë, është shprehur se sistemi TIMS ka kushtuar 24 milionë dollar.

Komentet Peka i bëri në emisionin “Now me Erla Mëhillin” në Euronews Albania, ku tha se TIMS i është dhuruar Shqipërisë në formën e një donacioni nga qeveria amerikane.

Ai tha gjithashtu se ky sistem përmban të dhëna shumë sensitive, pasi sipas tij, brenda tij ndodhen databaza të personave në kërkim, dosje kriminale, shenjat e gishtave, etj.

“Sistemi TIMS është një sistem që i është dhuruar qeverisë shqiptare nga qeveria amerikane. Ai është një donacion i qeverisë amerikane që ka kushtuar 24 milionë dollar. Ka filluar në 2007 dhe ka përfunduar në 2011.

Unë në atë kohë si zv.ministër i Brendshëm për Policinë e kam marrë në dorë zyrtarisht atë sistem. Kanë ardhur edhe inspektorë të zyrës së inspektorit të përgjithshëm të SHBA-ve, që e kanë kolauduar si sistem, e kanë parë dhe i kanë dhënë viston. Sistemi TIMS nuk shërben vetëm për kontrollin e pasaportave dhe hyrje daljeve, por është një sistem që ka çdo informacion criminal brenda tij.

Ka databazën e pasaportave, që kur kanë dalë pasaportat, e deri tani. Ka databazën e personave në kërkim, shenjat e gishtave, dosjet kriminale. TIMS është një sistem inteligjent që merr copëza informacioni dhe i përpunon vetë”, tha Peka.

LEXONI GJITHASHTU:

• Akuzohet se ndërhyri në ‘TIMS’, Rrumbullaku pezullon nga detyra drejtorin e IT
• Komisioni për sistemin TIMS, “Berisha” nxit debate mes Salianjit dhe Gogut