Kandidatja e PD-së Lediana Fratari: Pse dua të jem pjesë e Kuvendit

Në këto zgjedhje parlamentare, partive u janë bashkuar edhe shumë kandidatë të rinj. Njëra prej tyre është Lediana Fratari, e cila është bërë pjesë në listën e Partisë Demokratike dhe kandidon në njësinë nr.5 në Tiranë.

Përballë gazetares Bruna Çifligu, znj. Fratari tregoi për Euronews Albania se si është bërë pjesë e listës së kandidatëve të selisë blu, ndërsa veçoi se dëshira për këtë plan ka qene e dyanshme si nga PD-ja ashtu dhe nga vetë ajo.

“Ka qenë një proces i ndërsjellë. Unë Jam rikthyer në Shqipëri para gjashtë viteve dhe kanë dashur që të kisha mundësinë që të isha pjesë e Kuvendit të Shqipërisë dhe arrita më në fund të jem pjesë e listave të PD-së për qarkun e Tiranës. Jam përfshirë më përpara në politikë, kam qenë anëtare e Këshillat kombëtar të PD me vota nga anëtarët  e PD. Kam dhënë një kontribut personal në këtë parti politike. Unë jam brumosur me filozoftë e djathta”, tha ajo.

Ajo tha se synon të bëhet pjesë e Kuvendit të Shqipërisë në mënyrë që të japë kontribut për këtë forcë politike dhe qytetarët që ajo përfaqëson.

“Synimi im është patjetër, që më e rëndësishmja nga të gjitha është që PD të fitojë zgjedhjet me një mandat në Kuvend në 70 +1. Qëllim im personal është që unë të jem pjesë e Kuvendit të Shqipërisë dhe ky është premtimi që i kam bërë kryetarit të PD dhe zonës që unë përfaqësoj, që është zona nr.5 në Tiranë”, tha ajo.

Kandidatja e PD-së për deputete në Tiranë u shpreh se nëse do të fitojë një vend në Kuvend do të mbrojë interesin e ish-të përndjekurve politikë: “Unë vij nga një familje e përndjekur politike. Të përndjekurit politikë dhe kjo shtresë është grupimi kryesor, të cilës do t’i përgjigjem dhe kjo është shtresa ku zërin e të cilëve do ta ngrejë në Kuvend. Unë jam e bindur se PD do të fitojë në zgjedhjet e 25 prillit”,  shtoi ajo.