PAA, PR dhe PBDNJ depozitojnë ndryshimet në kodin zgjedhor, kërkojnë koalicione

Kur jemi futur në vitin e fundit para zgjedhjeve të përgjithshme që janë planifikuar për t’u zhvilluar mes 15 prillit dhe 15 majit, reforma zgjedhore është shndërruar në temën kryesore për jetën politike.

Në Parlament është ngritur një grup dialogu mes 3 grupeve më të mëdha politike, Partisë socialiste, Rithemelimit dhe Partisë së Lirisë, ku do të diskutohet për ndryshimet që do i bëhen Kodit Zgjedhor.

Por në kushtet kur nga ky organ parlamentar puna nuk ka avancuar me ritme të shpejta, por edhe përfaqësimi i zërave të tjera politike është i limituar, partitë e vogla kanë bërë lëvizjen e parë. Partia Agrare Ambientaliste, Partia Republikane dhe PBDNJ kanë dorëzuar në Kuvend një projektligj ku kërkojnë disa ndryshime në Kodin Zgjedhor.

Në projektligjin e depozituar në Kuvend nga Agron Duka, Fatmir Mediu dhe Vangjel Dule, kërkohet rikthimi i koalicionet parazgjedhore në modelin që është aplikuar në 3 palë zgjedhje të përgjithshme, para se të ndryshohej në korrik 2020.

Gjithashtu këto tre parti të vogla kërkojnë votim me lista të hapura për të paktën 2/3 e listës së kandidatëve dhe korrektim kombëtar. Në korrektimin kombëtar të votave përfshihen partitë që marrin së paku 0.5 të votave në rang vendi.

Me këtë ndryshim në Kod, 3 kryetarët e partive të vogla pretendojnë se do të bëhej i mundur një përfaqësim më i të drejtë për partitë politike që me sistemin aktual zgjedhor u digjen shumë vota në qarqe të vegjël.

LEXONI GJITHASHTU: 

• EUROSTAT:  Në BE 7% punojnë 49 orë, në Shqipëri 36% bëjnë orë shtesë
• Zgjidhet Kryesia e re politike e Partisë së Lirisë, emrat fitues