Publikohen videot pas vrasjes së armikut të Martinaj, e shkuara e errët e “Sidit”

Mbrëmjen e së enjtes në Athinë u ekzekutua me armë zjarri 32-vjeçari Roan Brahimi alias Sidorel Prendi në një atentat mafioz, teksa ndodhej me të dashurën Katerina Beqo në makinë dhe pak metra larg automjetit ndodhej dhe djali i tyre i vogël duke luajtur në një park.

Mediat greke kanë publikuar dhe pamjet pak pas vrasjes së 32-vjeçarit, i cili u ekzekutua nga dy persona që lëviznin me motor.

Në video shihet një numër i lart qytetarësh të mbledhur rreth mjetit ku ndodhej trupi i 32-vjeçarit.

Roan Brahimi alias Sidorel Prendi, i cili për miqtë dhe të afërmit njihej si “Sidi”, nuk ishte një emër i panjohur për Policinë e Shtetit, teksa njihej dhe si rival i njerëzve të afërt të të shumëkërkuarit Ervis Martinaj.

Në vitin 2014, Roan Brahimit iu vranë në atentat dy djem xhaxhallarësh dhe u plagos një tjetër. Konkretisht mbetën të vrarë Klodian Ndreca e Taulant Prendi dhe u plagos Aurel Prendi.

Katër vite më vonë, ai u arrestua në Lezhë, ku iu sekuestruan municione, euro dhe bizhuteri të dyshuara nga veprimtaria kriminale e vjedhjes.

Ndërkohë në dhjetor të vitit 2020, lokali në pronësi të Gjovalin Prendit, babai i Roan Brahimit alias Sidore Prendit, u qëllua me breshëri plumbash, por fatmirësisht nuk pati persona të lënduar.

Ndërsa, në vitin 2021, Roan Brahimi u shpall në kërkim nga policia, pasi së bashku me dy persona të tjerë shkaktuan terror në një lokal në Zejmen të Lezhës. Bashkë me Ramazan Rrajën dhe Alesio Dobrozi, ata u futën të armatosur me kallashnikov duke kërkuar pronarin, ngjarje e ndodhur në vitin 2021.

Roan Brahimi alias Sidorel Prendi dyshohet si i përfshirë dhe në dy atentatet që tronditën vendin në verën e vitit 2022. Më konkretisht atë të 17 korrikut 2022 tek mbikalimi i Fushë Krujës, ku u ekzekutua djali i xhaxhait të Ervis Martinajt, Brilant Martinaj, bashkë me dy shokët e tij Diklen Vata dhe Besmir Hoxha. Po ashtu, dyshohet si i përfshirë edhe në atentatin e regjistruar ndaj krahut të djathtë të Ervis Martinajt, Ylli Brahimi alias Ylli Brahja, i cili mbeti i plagosur dhe u ekzekutua Klisman Preçi.

Për të dyja ngjarjet, ai ka qenë në kërkim, ku policia ka ushtruar kontrolle në banesën e tij në fshatin Pllanë të Lezhës, por nuk u gjet në banesë si në atentatin e parë, po ashtu edhe në të dytin.

Për ngjarjen ku humbi jetën 32-vjecari një natë më parë në Athinë, dyshohet se është kryer nga vrasës me pagesë, por nuk dihet se për llogari të kujt është kryer ekzekutimi.

LEXONI GJITHASHTU:

• U vra në sy të gruas, kush është armiku i Ervis Martinajt që mbeti i vdekur (Emri)
• Greqi| Atentat me armë zjarri ndaj 2 shqiptarëve, vritet burri, plagoset gruaja