Haziri: Kurti të japë dorëheqjen! LDK shihet si konkurrent i fortë në zgjedhje

Nënkryetari i Lidhjes Demokratike të Kosovës, Lutfi Haziri, është shprehur se kryeministri Albin Kurti duhet të japë dorëheqjen, në mënyrë që të mbahen zgjedhjet parlamentare në Kosovë.

Komentet Haziri i bëri në Euronews Albania, ku tha se pas dorëheqjes së Kurtit, do të bëhet shpërndarja e parlamentit dhe më pas do të gjendet një datë konsensuale për zgjedhjet.

Ai tha gjithashtu se LDK do të jetë një konkurrent shumë i fuqishëm në zgjedhjet e ardhshme dhe kjo sipas tij duket edhe në frikën që kanë partitë konkurrente në Kosovë.

“Gara do të jetë e fuqishme dhe ne këtu e shohim një lloj frike reagimin e PDK me ofrimin e tyre në darkën e mbrëmshme dhe në axhendë për të gjetur mënyrën si do shpërndahet Parlamenti i Kosovës për zgjedhjet e ardhshme.

Sepse ata e shohin LDK si një konkurrent të fortë në zgjedhjet e ardhshme. Ne e kemi riparuar shumë besimin nga zgjedhjet e shkuara. Ne kemi konfirmuar sot se rruga më e mirë që Kurti të japë dorëheqjen, është i vetmi opsion real për këto zgjedhje të jashtëzakonshme.

Kjo krijon mënyrën për shpërndarjen e Parlamentit dhe do të kemi më pas një datë për zgjedhjet. Ky është qëndrimi i LDK-së dhe besojmë se është qëndrimi më korrekt që edhe Kurti duhet ta ketë ndaj qytetarëve të Kosovës”, tha Haziri.

LEXONI GJITHASHTU:

• Kurti shpreh gatishmëri për të diskutuar datën e zgjedhjeve
• Kurti takim urgjent me krerët e opozitës, i përgjigjet vetëm PDK