Sali Berisha mbetet non-grata në Britani, Reuters: Humbi gjyqin në Londër

Reuters shkruan se udhëheqësi i opozitës në Shqipëri, Sali Berisha, ka humbur gjyqin në Londër, ku apeloi vendimin për shpalljen non-grata nga ana e Britanisë së Madhe.

Keu i Partisë Demokratike, u shpall non-grata nga Mbretëria e Bashkuar në vitin 2022 për lidhjet e tij të dyshuara me krimin e organizuar dhe korrupsionin, të cilat ai i mohon, shkruan Reuters.

Ai apeloi kundër vendimit në Komisionin Special të Apelimit të Emigracionit (SIAC) në muajin mars, duke argumentuar se iu ndalua hyrja në Mbretërinë e Bashkuar në bazë të pohimeve të rreme dhe të paprovuara.

Reuters thekson se SIAC hodhi poshtë padinë e Berishës në një vendim të marrë këtë të hënë (17 qershor).

Vendimi i Britanisë për të shpallur non grata Sali Berishën erdhi një vit pasi ai u sanksionua edhe nga Shtetet e Bashkuara nën dyshimet për korrupsion dhe abuzim me pushtetin ekzekutiv.

“Berisha, 79 vjeç, përballet me akuza në Shqipëri se ka përdorur ndikimin e tij kur ishte kryeministër midis viteve 2005 dhe 2009 për të favorizuar bashkëshortin e vajzës së tij në privatizimin e tokës shtetërore, të cilat ai dhe vajza e tij e mohojnë”, theksohet më tej në shkrimin e Reuters.

LEXONI GJITHASHTU:

• Berisha tjetër kërkesë në Gjykatë të Lartë për revokim të masës së sigurisë
• Gjykata i dha vulën, Berisha: Fitorja e sotme, më e rëndësishmja në historinë e PD