Ekipet shqiptare në Champions: Ballkani triumf me përmbysje, në mbrëmje luan Egnatia

Ballkani e ka nisur në mënyrë më të mirë të mundshme aventurën në ligën e kampionëve, duke marrë një fitore me vlerë që në nisje, ndaj Santa Coloma. Të besuarit e Ilir Dajës ishin superior ndaj kundërshtarit, i cili arriti të gjente golin i pari duke zhbllokuar duelin. El Ghazoui e ndali topin në rrjetë, pas një devijimi në zonë, ndërsa u bë e pakapshme për portierin Kolici.

Emërllahu riktheu ekuilibrat me një 11 metërsh brenda 45 minutave të para, ndërsa në fraksionin e dytë Karrica vulosi fitoren 1-2, e cila i jep përparësi ekipit nga Suhareka para sfidës së kthimit. Skuadra tjetër shqiptare e Malit të Zi, Decic e nisi me humbje, duke u mposhtur në shifrat 3-0 nga TNS. Uellsianët shënuan 3 herë në pjesën e parë, duke mos i lënë asgjë rastësisë, e vrarë shpresat e kundërshtarit.

Mbrëmjen e kësaj të mërkure në fushë zbret Egnatia, kampionia e Shqipërisë. Rrogozhinasit përballen me ekipin më të mirë boshnjak që sezonin e fundit fitoi titullin në kampionatin vendës, ndërkohë që pësoi vetëm 3 humbje në 33 duele. Trajneri Edlir Tetova e ka gati formacionin, ndërsa pritet rezultat pozitiv.