Ish-kryeministri i RMV, Zoran Zaev jep dëshminë e tij për rastin “Monstra”, ku u vranë pesë të rinj maqedonas

Ish-kryeministri i Maqedonisë së Veriut, Zoran Zaev thotë se në rastin “Monstra”, ku në vitin 2012 u vranë pesë të rinj maqedonas në periferi të Shkupit, krim për të cilin akuzohen gjashtë shqiptarë, ka shumë dyshime, por prokuroria dhe gjykata janë ato që duhet t’i zbardhin.

Më herët në daljet e tij publike Zaev ka shprehur se shqiptarët e akuzuar janë të pafajshëm. Bisedat e përgjuara telefonike e deri tek transkriptet, janë dorëzuar në Prokurorinë Publike Speciale.

“Ndoshta hetimi do të dëshmojë se dikush, një pjesë e tyre, të gjithë janë të pafajshëm, apo fajtorë, por ta lemë hetimin që ta thotë fjalën e fundit. Atëherë kam thënë atë që kam ndjerë, publikisht”, është shprehur Zoran Zaev, dëshmitar në ngjarje.

“Nëse shikoni me vëmendje, të gjithë ata që janë dënuar dhe akuzuar, do e keni të qartë përse Zoran Zaev, i cili i ka lexuar ato biseda në formë transkriptesh, i ka dhënë vetes të drejtë të bëjë këto lloj komentesh apo kundërshtimesh të verdiktit të vitit 2015. Sot jam dëshmitar dhe besoj se me dëshminë time do të ndihmoj procesin që të zbardhet e vërteta dhe të arrihet drejtësia”, ka shtuar më pas ai.

Por, avokatja e familjarëve të djemve të vrarë thotë se deklarata e ish-kryeministrit nuk e ka ndihmuar fare procesin gjyqësor pasi gjithçka ishte fjalim politik e jo të dhëna thelbësore.

“Ajo që dëgjuam në sallën e gjykatës, nuk ishte asgjë e re, asgjë bombastike. Mendoj se Zaevi është i zoti për politikë, dhe se të gjitha përgjigjet i kishte politike. Nuk kishte përgjigje konkrete që do të ndihmonte për zbardhjen e rastit”, ka deklaruar avokatja Dafinka Ivanovska.

As prokuroria speciale deri më tani nuk ka arritur të nxjerrë ndonjë element të ri nga bisedat e përgjuara, që do të tregonin se kush është vrasësi i pesëfishtë i vitit 2012 që u bë shkak edhe për protesta të shqiptarëve për lirimin e të akuzuarve.