Egnatia nis me hap kampioni, Dinamo stonon në ndeshjen e parë

Ka nisur pa surpriza java e parë e Superligës shqiptare për edicionin 2024-25. Kampionët e Egnatias mundën në “Elbasan Arena” Dinamon, duke u rikonfirmuar edhe një herë se janë ata ekipi për t’u mposhtur këtë sezon dhe hedhin fashën ndaj ekipeve të tjera në luftën për titullin kampion këtë sezon.

Ndeshja në Elbasan ishte gati e barabartë në pjesën e parë, me të dyja ekipet që provuan të rrezikonin dhe e kërkuan avantazhin, por çdo gjë u mbyll me shifrat 0-0. Në pjesën e dytë ishte përcaktuese, eksperienca e ekipit të drejtuar nga Ilir Tetova që shënoi dhe administroi qetë lojën përballë një Dinamoje, që pavarësisht afrimeve të bujshme në merkato sërish do i duhet punë dhe kohë për të arritur, atje ku presidenca e klubit pretendon.

Sakaq përballja tjetër në “Niko Dovana” në Durrës mes Teutës dhe Bylisit ishte më dramatike. Fillimisht ishin mallakastriotët që kaluan në avantazh që falë edhe entuziazmit pas rikthimit në Superligë dominuan vendasit. Por bregdetarët e drejtuar nga Edi Martini reaguan shpejt, fillimisht duke barazuar në pjesën e parë dhe më pas e kërkuan deri në fund golin e fitores që erdhi në minutën e 90-të.

LEXONI GJITHASHTU:

• Ekipet shqiptare në Champions: Ballkani triumf me përmbysje, në mbrëmje luan Egnatia
• Champions League| Hidhet shorti i raundit të parë, Egnatia përballë Bosnjës