Rekord historik për Ronaldon, portugezi shënon golin e 900-të në karrierë

Askush si ai në botën e futbollit, CR7 është padyshim një rekordmen absolut kur vjen puna në shënimin e golave, duke gjetur rrjetën e 900 si futbollist profesionist. Këtë e bëri në duelin e Ligës së Kombeve, aty ku luzitanët fituan ndaj Kroacisë 2-1.

Goli i parë erdhi nga Dalot, ndërsa i dyti nga 39-vjeçari i lindur në Madeira, që shkruan kështu historinë. Në shifrat zyrtare Ronaldo është padyshim futbollisti që ka shënuar më tepër në futboll, duke lënë pas Lionel Messin edhe pse është përfolur që njeriu që mban rekordin është braziliani Pele me mbi 1200 rrjeta, megjithëse asokohe ligjet e futbollit nuk ishin njësoj.

Sa i përket Ronaldos, pjesa më e madhe e golave të tij u shënuan teksa ishte pjesë e Los Blancos ku arriti të fitojë dhjetëra trofe e ngrinte emrin e tij në majën e piramidës së futbollit modern. Aktualisht aktivizohet tek Al Nassr ku numëron mbi 50 gola, ndërsa pas përfundimit të karrierës do të marrë rolin e ambasadorit.

Kujtojmë se Ronaldo e nisi karrierën te Sportingu i Lisbonës ku shënoi 5 gola, ndërsa spikati duke u transferuar menjëherë tek gjigantët e Manchester United.

LEXONI GJITHASHTU:

• Ronaldo dhe Buffon nderohen me çmim special nga presidenti i UEFA-s
• UEFA vlerëson Ronaldon, portugezi merr çmimin special