PD homazhe për Azem Hajdarin, Noka: Mesazhi i tij më aktual se kurrë

26 vite më parë u ekzekutua një nga themeluesit e Partisë Demokratike Azem Hajdari, një nga figurat më të rëndësishme të viteve të para të pluralizmit në Shqipëri.

Deputetë dhe eksponentë të lartë të Partisë Demokratike bënë këtë të enjte homazhe në memorialin e liderit të lëvizjes studentore që ndodhet pranë Kalasë së Tiranës.

Sekretari i Përgjithshëm i Partisë Demokratike, Flamur Noka, deklaroi për nga homazhet se mesazhi i Azem Hajdarit është më aktual se kurrë. Ai tha se opozita e sotme nuk ka një regjim bolshevik përballë, por një narko-regjim.

“Azem Hajdari dhe studentët u përballën dhe sfiduan regjimin më gjakatar që ka pasur historia. Ata dhanë një mesazh që guximi dhe kurajoja janë rruga që duhet të zgjedhësh kur ke përballë një regjim.

Mesazhi i Azem Hajdarit është më adekuat se kurrë. Sot kemi një narkoregjim, të krimit dhe të bandave. Të ngrihemi dhe të rrëzojmë narkoregjimin që është dhe më i rrezikshëm se regjimi bolshevik. Revolta popullore po zien dhe mbetet vetëm që ne t’i prijmë asaj. Ka vetëm një rrugë, qeveri teknike për të shkuar vendi në zgjedhje”, tha Noka.

Kreu i PD-së thotë se emri i Azem Hajdarit është simbol bashkimi për demokratët, sidomos në rrethanat aktuale që siç thotë ai “fatet e demokracisë janë të pasigurta dhe perspektiva  europiane e Shqipërisë po kërcënohet nga korrupsioni dhe regjimi i pakicës”.

Udhëheqës i Lëvizjes Studentore të dhjetorit 1990, Azem Hajdari me rezistencë dhe mbështeje të gjerë të studentëve, arriti të ishte një nga eksponentë kyç të rrëzimit të sistemit komunist në Shqipëri, ndërsa i hapi rrugë vendosjes së pluralizmit politik.

Ai ishte gjithashtu një nga themeluesit e Partisë Demokratike të Shqipërisë dhe njëherësh kryetar i Komisionit Nismëtar të kësaj partie. Azem Hajdari mbajti postin e deputetit në radhët e Partisë Demokratike të Shqipërisë që nga viti 1991 e deri sa u vra, më 12 shtator të vitit 1998.

LEXONI GJITHASHTU:

• “O vlla, më duhet Mondi”- Bardhi i lexon përgjimet e Sky Ramës: Kush ta emëroi….
• Rama përgjigjet për mbetjet toksike: Aludim psikopatologjik, nuk janë të rrezikshme