Mësim në xhami për shqiptarët, prindërit maqedonas nuk i lejojnë në shkollë

Kjo është xhamia e komunës së Çashkës në Maqedoninë e Veriut, ku nxënësit shqiptarë atje do të duhet të zhvillojnë procesin e mësimit, pasi në shkollë nuk lejohen nga prindërit maqedonas.

Fëmijët e tre fshatrave do të mësojnë në xhaminë e fshatit Banjicë të Komunës së Çashkës.

Këtë formë e kanë kundërshtuar prindërit e fëmijëve shqiptarë, të cilët kërkojnë që ata të trajtohen në mënyrë të barabartë me fëmijët maqedonas.

“Unë nuk pranoj. As në mekteb as në xhami ato fjalë janë boshe”, thotë një prind.

Ministri i Arsimit Lulzim Aliu nuk pranon se në këtë formë po shkelet mënyra laike e mësimdhënies duke e justifikuar me faktin se nxënësit nuk duhet të humbasin procesin mësimor.

“Unë jam i lumtur që nxënësit mësojnë, a ju si do ta quani është e drejta juaj. Unë jam i kënaqur se po bëjmë një punë më të rëndësishme se sa t’i dërgojmë fëmijët në atë shkollë, për këtë po themelojmë një subjekt të ri shkollor”, shprehet Lulzim Aliu, ministër i Arsimit në RMV.

Edhe pse vitin e kaluar pati protesta dhe kundërshtim që mos të hapet një institucion arsimor paralel për nxënësit shqiptarë, kjo ide në fund u realizua. Nxënësit e klasës së parë vitin e kaluar mësuan në gjuhën shqipe në shkollën “Todor Janev”. Por këtë vit prindërit maqedonas dhe drejtori i shkollës nuk po lejojnë zhvillimin e procesit arsimor në shqip.

LEXONI GJITHASHTU:

• Kosova arreston një person nga RMV, i gjetën makineri për prodhim të parave false
• Ekskluzive| Skandali me Osmanin në Shkup, këshilltarja e Presidentes: RMV u njoftua!