Tezja e 14-vjeçarit të vrarë humb ndjenjat në protestë, largohet me ambulancë

Dhjetëra qytetarë, prindër dhe fëmijë, morën pjesë këtë të enjte në një marshim nga shkolla “Fan Noli” drejt Ministrisë së Arsimit, si shenjë proteste për vrasjen e 14-vjeçarit nga bashkëmoshatari i tij.

E pranishme në protestën përpara ministrisë ishte dhe tezja e 14-vjeçarit, e cila, në një gjendje të rënduar emocionale, shfaqi probleme shëndetësore gjatë protestës. E shoqëruar nga një e afërme e saj, tezja humbi ndjenjat dhe u detyrua të dërgohej me ambulancë për të marrë ndihmën e parë mjekësore.

Në deklaratën e shkurtër që mbajti përpara kamerave, ajo, mes lotësh, tha se djali ishte dërguar në shkollë dhe jo në luftë, duke shprehur dhimbjen e thellë për humbjen e tij.

“E çuam në shkollë dhe jo në luftë që të na e therin. Nuk më gjen gjë. Gjithë bota ka mbajtur zi për të, jo vetëm Shqipëria. Ç’më duhet uji, ka katër ditë që Martini nuk pi ujë”, tha ajo.

Kujtojmë se 14-vjeçari u vra ditën e hënë nga një bashkëmoshatar i tij, gjatë një konflikti me thikë në ambientet e jashtme pranë shkollës 9-vjeçare “Fan Noli”. Dhjetëra prindër dhe fëmijë u bashkuan në protestën e kësaj të enjteje, duke kërkuar më shumë siguri në shkolla.

LEXONI GJITHASHTU:

• “Boshllëk që s’do mbushet kurrë”- Nëna e 14-vjeçarit përlot protestuesit
• “Djali ka 3 ditë që nuk fle”- Prindër te “Fan Noli” përkujtojnë 14-vjeçarin e vrarë