Ministria e Shëndetësisë së Kosovës: Uji nga Ibër-Lepenci nuk mund të pihet

Ministria e Shëndetësisë së Kosovës ka njoftuar se uji që kalon në kanalin e Ibër-Lepencit nuk është i pastër për momentin dhe nuk duhet të pihet. Nëpërmjet një njoftimi në Facebook MSH e Kosovës thotë se janë kryer disa analiza të këtij uji dhe pas përgjigjes së tyre kanë dalë në përfundimin se ky ujë nuk duhet pirë deri në një moment të dytë.

Njoftimi i plotë

Pas shpërthimit në kanalin e Iber-Lepencit në komunën e Zubin Potokut, IKSHPK, respektivisht Qendra Rajonale e Shëndetësisë Publike në Mitrovicë, në bashkëpunim me Kompaninë Rajonale Ujësjellësi “Mitrovica” kanë marrë mostrat e ujit të patrajtuar për të kryer analizat e nevojshme.

Sipas analizave të para, të kryera në ujin e patrajtuar, uji që kalon nëpër kanalin e Ibër-Lepencit nuk është për momentin i pastër për pije, ndërkohë që përveç analizave mikrobiologjike dhe atyre bakteriologjike, IKSHPK/QRSHP Mitrovicë, do të analizojë edhe paramatra të tjerë që kanë të bëjnë me praninë e metaleve në ujë.

IKSHPK është në bashkëpunim të ngushtë me Kompaninë Rajonale Ujësjellësi në Mitrovicë dhe KRU “Prishtina”, do të monitorojnë ujin nga Kanali i Ibër Lepencit dhe do t’i  kryejnë të gjitha analizat e nevojshme për t’u siguruar që uji, para se të lejohet për pije, t’i përmbush parametrat e lejuar.

Ministria e Shëndetësisë dhe IKSHPK sigurojnë qytetarët që janë duke u ndërmarrë të gjitha masat e nevojshme që uji që përdoret në zonat e prekura nga pasojat e shpërthimit t’i përmbushë standardet e lejuara.

Ju lutemi që t’i merrni informatat nga njoftimet zyrtare të Ministrisë së Shëndetësisë dhe IKSHPK-së!

LEXONI GJITHASHTU:

• Sulmi terrorist në Veri, Osmani takon komandantin e KFOR
• Sulmi në Zubin Potok, Kurti mbledh Këshillin e Sigurisë, aktivizohet…