Dinamo mposht Tiranën dhe merr kreun e Superligës, Partizani ndalet nga Elbasani

Superliga nisi këtë të shtunë me tre ndeshjet e para për javën e 18-të. Në derbin e kryeqytetit ishte Dinamo e Ilir Dajës që triumfoi 2-1 ndaj Tiranës në “Elbasan Arena” duke u ngjitur në krye të klasifikimit në kuotën e 31 pikëve, aq sa ka grumbulluar Vllaznia në 18 javë, por me golavarazh më të mirë se ekipi kuqeblu.

Magani pëson humbjen e parë si trajner te Tirana pas katër barazimesh radhazi.

Mes shiut që shoqëroi ndeshjen, Dinamo shënoi dy gola të shpejtë me Qefalijan dhe Nanin në minutat 29-të dhe 30-të ndërsa në fund Tirana shkurtoi me Ndrecën, gol që vleu sa për statistika. Tashmë “Final Four” duket largë për bardheblutë, që për momentin duhet të shqetësohen për garën e mbijetesës.

Tre pikë mori Vllaznia në shtëpi ku fitoi 2-1 ndaj Laçit, ndërsa në kryeqytet Partizani u ndal nga AF Elbasani në barazim 2-2.

Në “Arenën e Demave” Mba kaloi të kuqtë në epërsi pas 14 minutash, para se miqtë e Gvozdenovic të përmbysnin me Blaise dhe Mustën në pjesën e parë. Janjeva te Partizani barazoi sfidën në pjesën e dytë.

Java e 18-të e Superligës mbyllet të dielën me dy sfida. Në Korçë luhet Skënderbeu – Bylis dhe në Durrës ekipi i Teutës pret Egnatian.

LEXONI GJITHASHTU:

• Serbia pa tifozë në përballjen kundër Shqipërisë për kualifikueset e Botërorit
• Të hënën zyrtarizohet Europiani U-21, kompeticioni mes Shqipërisë dhe Serbisë