Trupi i Kryepeshkopit Anastas mbërrin sot në Shqipëri, besimtarët e presin në kufi

Këtë të martë pritet të vijë në Shqipëri trupi i pajetë i kryepeshkpopit, Anastas Janullatos.

Besimtarë të fshatrave Dervician, Jorgucat e të tjerë janë duke u mbledhur në pikën e kalimit kufitar të Kakavijës, në pritje të trupit të ish-Kryepeshkopit Janullatos.

Ndërkohë  sipas informacioneve është pezulluar puna në pikën e kalimit kufitar të Kakavijës, ku shtetasit që duhet të kalojnë drejt Greqisë apo anasjelltas, duhet të presin kalimi e trupit.

Nisja e arkëmortit u bë ditën e djeshme rreth orës 10:00 nga Katedralja e Athinës, ndërsa do të hyjë në territorin shqiptar përmes pikës së kalimit kufitar të Kakavijës.

Në Tiranë trupi i pajetë mbërrin sot rreth orës 16:00, ku do të zhvillohen homazhe për një periudhë dy ditore.

Ndërsa, në emër të Kishës së Greqisë, do të jetë i pranishëm nënkryetari i Sinodit të Shenjtë, Mitropoliti i Nafpaktos dhe Shën Vlashit Vlasios Ierotheos.

Gjatë rrugës do të ketë ndalesa në zonat që ai shërbeu dhe punoi për rindërtimin e Kishës Autoqefale shqiptare.

Shoqërues të kortezhit do të jenë 4 klerikë shqiptarë, mitropoliti i Apolonisë dhe Fierit, Nikolla, peshkopi i Krujës Anastas dhe priftërinjtë Harallamb Gjoka e Spirodhon Topanxha, bashkëpunëtorë të ngushtë të tij në ringritjen gjalljen e Kishës Ortodokse Autoqefale të Shqipërisë.

Ceremonia mortore do të zhvillohet ditën e enjte në orën 11:00.

Sipas mediave helene Kryeministri Kyriakos Mitsotakis së bashku me Kryepeshkopin e Greqisë do të jenë në Tiranë të enjten për të marrë pjesë në funeralin për Kryepeshkopin e ndjerë Anastas Janullatos.

Kujtojmë se pas vdekjes së Kryepeshkopit Anastas Janullatos, Kisha Ortodokse Autoqefale e Shqipërisë shpalli zi kishtare për pesë ditë, nga 25 Janari deri më 29 Janar.

LEXONI GJITHASHTU:

• Shqipëria mban meshat e përshpirtjes për Kryepeshkopin Anastas Janullatos
• Ndarja nga jeta e Janullatos, Dora Bakojanis: Një nga hierarkët më të ndritur!