Berisha mesazh demokratëve: Krimin, prokurorinë e gjykatat i kemi kundër në zgjedhje

Kryetari i Partisë Demokratike, Sali Berisha, u ndal gjatë fjalës së tij në protestën e opozitës te fushata elektorale për zgjedhjet që pritet të mbahen më 11 maj.

Berisha theksoi se krimi, prokuroria dhe gjykatat janë kundër Partisë Demokratike në zgjedhjet e ardhshme.

Ai theksoi se edhe pse është bërë shumë përpjekje për të asgjësuar opozitën, demokratët mbetën të patrembur dhe do të luftojnë të triumfojnë më 11 maj.

“Miqtë e mi, krimi dhe bota e tij janë kundër nesh, prokuroria politike dhe gjykata e narkoshtetit janë kundër nesh, por ne qëndrojmë të sigurt në fitoren tonë. Ne arritëm të bëjmë pluhur dhe të shembim ëndrrën e pasardhësit të xhelatit komunist, i cili firmosi varjen e Havzi Nelës në litar, Edi Ramës, por dhe monstrës së njerëzimit Xhorxh Soros që tentuan të shkatërrojnë opozitën. Gjithçka u bë që Shqipëria të mbetej pa opozitë, dhe kryetari i Partisë Demokratike u vendos në arrest shtëpie me urdhër të Edi Ramës. Me urdhër të Edi Ramës, ish-presidenti u përball me dhunë në mes të rrugës, duke menduar ky kriminel se do të tmerronte opozitën. Deputeti ynë Ervin Salianji, martiri i fjalës së lirë, u burgos sepse u përball me klanin më të rrezikshëm të Shqipërisë, Ballkanit dhe Evropës, klanin Rama-Xhafa. Menduan se do të na trembnin, por ja ku jemi, 200 metra më tutje, kemi udhëheqësin tonë të përjetshëm, Skënderbeun. Kush mund të trembë popullin opozitar, popullin e lirisë? Jo, ata që mendojnë se mund të na trembin do të mjerohen.”

Berisha u ndal edhe te takimet që pati në Gjermani, ku theksoi se kandidati për kancelar, Friedrich Merz, nga radhët e Bashkimit Kristian Demokrat Gjerman, dhe miqtë e PD në Berlin mezi presin fitoren e kësaj force politike në Shqipëri.

“Të dashur miq, para disa ditësh isha në Berlin dhe mora pjesë në kongresin e Bashkimit Kristian Demokrat gjerman, aty shtrëngova duar përzemërsisht me kancelarin e ardhshëm gjerman, takova miq të vjetër e të rinj, dhe ata mezi presin fitoren e Partisë Demokratike. Unë u zotova për zero tolerancë ndaj eksportimit të krimit dhe refugjatëve në Evropë.”

LEXONI GJITHASHTU:

• Protesta e PD, Mediu: Ne hapëm rrugën e ndryshimit, SHBA na mbështeti drejt NATO-s
• VIDEO-LIVE| Berisha marshon drejt Kryeministrisë, nis protesta e PD