Protestuesit në Greqi hedhin bomba me benzinë, policia përdor gaz lotsjellës

Protesta në Greqi ka kaluar në dhunë, teksa demonstruesit hodhën bomba me benzinë dhe policia përdori gaz lotsjellës gjatë një tubimi në qendër të Athinës.

Protesta shënonte përvjetorin e aksidenti tragjik të ndodhur në shkurt të vitit 2023, kur një tren pasagjerësh që transportonte studentë u përplas me një tren mallrash në Tempi, duke shkaktuar 57 të vdekur.

Dhjetëra të rinj, të mbuluar me kapuç, hodhën molotov dhe shkatërruan pjesë të shtrimit të rrugëve, duke u përpjekur të sulmojnë barrikadat e vendosura nga policia para parlamentit. Për të shpërndarë turmën, forcat e policisë përdorën gazin lotsjellës.

Mijëra qytetarë morën pjesë në demonstrata që u zhvilluan në disa qytete të Greqisë, duke kërkuar drejtësi për viktimat e aksidentit, që ndodhi dy vjet më parë. Protestuesit brohoritën me sloganin “Ju numëroni fitimet, ne numërojmë jetët”, duke mbajtur tullumbace të zeza dhe pankarta anti-qeveritare. Ata kritikuan autoritetet për dështimin në trajtimin e ngjarjes dhe për mungesën e përgjegjësisë.

Demonstratat janë udhëhequr nga familjarët e 57 personave të vrarë dhe janë ndër më të mëdhatë që nga kriza e borxhit të vendit më shumë se një dekadë më parë.

Ky incident është bërë simbol i dështimit të institucioneve shtetërore dhe ka nxitur një valë të madhe protestash. Protestat janë mbajtur gjithashtu si pjesë e një greve të përgjithshme në të gjithë vendin, ku janë përfshirë kontrollet ajrore, transporti detar dhe trenat.

Greva ka shkaktuar ndalimin e fluturimeve ndërkombëtare dhe të brendshme, ndërkohë që shumë biznese dhe dyqane janë mbyllur për të mbështetur protestat.

Ndërkaq, qeveria e kryeministrit Kyriakos Mitsotakis është përballur me kritika nga të afërmit e viktimave për dështimin për të nisur një hetim parlamentar për përgjegjësinë politike.

LEXONI GJITHASHTU:

• 2-vjetori i tragjedisë së trenave, protesta dhe greva masive në gjithë Greqinë
• Publikohet raporti i përplasjes së dy trenave në Tempi të Greqisë me 57 humbje jete