Shkëmbim zjarri mes rojeve dhe grabitësve që sulmuan furgonin me para në Prishtinë

Një ngjarje e rëndë ka ndodhur këtë të hënë në kryeqytetin e Kosovës, Prishtinë, ku një person ka mbetur i plagosur pas një tentative grabitjeje me armë zjarri.

Sipas informacioneve të para, ngjarja ka ndodhur rreth orës 10:30 në lagjen Veternik të Prishtinës, kur një grabitje e armatosur ka ndodhur në parkingun e një qendre tregtare.

Me furgonin që ra pre e sulmit po transportoheshin para dhe ishte i siguruar nga pjesëtarët e sigurisë.

Policia ka njoftuar se gjatë incidentit ka pasur shkëmbim të shtënash, ku një prej personave ka mbetur i plagosur.

Zëdhënësja e Policisë së Kosovës për rajonin e Prishtinës, Flora Ahmeti, ka konfirmuar se ngjarja dyshohet të ketë ndodhur gjatë përpjekjes së grabitjes ndaj furgonit që transportonte para.

Hetuesit e policisë janë duke vazhduar hetimet për zbardhjen e plotë të ngjarjes dhe identifikimin e personave të dyshuar.