Ndahet nga jeta ikona e kinematografisë shqiptare, Margarita Xhepa

Është ndarë nga jeta këtë të enjte ikona e kinematografisë shqiptare, Margarita Xhepa.

Aktorja e njohur, e cila u lind më 2 prill të vitit 1932 në qytetin e Lushnjës, nisi hapat e saj të parë drejt karrierës artistike që e bëri atë një emër të paharrueshëm në historinë e filmit shqiptar.

Ditën e djeshme ajo kishte 93-vjetorin e lindjes, ndërsa la pas një trashëgimi të çmuar në artin skenik.

Margarita Xhepa është konsideruar si një nga Zonjat e Mëdha të teatrit dhe filmit shqiptar që ka skalitur memorien e publikur shqiptare me role brilante që prej fillimit të saj, në vitet 60 dhe deri më tani.

Gjatë karrierës së saj të pasur, Margarita Xhepa interpretoi mbi 150 role në teatër dhe 32 role në kinematografi ndërsa fillimisht u aktivizua në Estradën e Shtetit dhe më pas në Teatrin Popullor.

Disa prej personazheve që interpretoi mjeshtërisht janë Zyraka te “Vitet e para” (1965), Shano te “Dimri i fundit” (1976), pianistja te “Koncert në vitin 1936” (1978) dhe Lena te “Tokë e përgjakur” (1976).

Veç suksesit me veprat e shumta të dramaturgëve shqiptarë, Margarita Xhepa ka korrur sukses edhe në rolet e dramaturgjisë botërore si, Ofelia tek “Hamleti”, vajza e dytë tek “Mbreti Lir”, dadoja tek “Romeo e Zhuljeta”, mbretëresha Margaret tek “Rikardi III”, Ledi Milfordin në dramën “Intrige e dashuri” (F. Shiler), Melën në dramën “Morali i zonjës Dulska” (G. Zapolska), Dafinën në dramatizimin e romanit “Lumi i vdekur” (J. Xoxa) dhe nënën në inskenimin e romanit të Kadaresë, “Kush e solli Doruntinën” etj.

Në vitin 1997, interpretoi në filmin grek “Mirupafshim” (regjisor J. Koras, K. Vupuras). Filmi u laureua me Çmimin e Madh në Festivalin Ndërkombëtar të Filmit Mesdhetar në Selanik, ndërsa Margarita Xhepa, Çmimin e Nderit.

Në maj të vitit 2004, u rikthye në skenën e Teatrit Kombëtar për të shkëlqyer në dramën “Streha e të harruarve”, një tjetër sukses në karrierën e saj 50-vjecare.

Në vitin 2007, aktores iu dha “Çmimi i Karrierës” për rolin e Nadjezhnës në monodramën “Kënga e mjellmës” së Çehovit, ndërsa iu është akorduar gjithashtu edhe titulli “Artiste e Popullit”.

LEXONI GJITHASHTU:

• “Këpucët e kuqe”, Margarita Xhepa ngjitet në skenë në moshën 90-vjeçare
• Filmi “The ring” vjen në Tiranë, përkujtohet Holokausti dhe çlirimi i kampit nazist