Rama në Konferencën Ndërqeveritare me BE, hapet grup-kapitulli i dytë i negociatave

Shqipëria do të zhvillojë këtë të hënë konferencën e katërt ndërqeveritare BE-Shqipëri në Luksemburg, ku i pranishëm do të jetë edhe kreu i qeverisë, Edi Rama.

Shqipëria çel grupkapitullin e dytë të negociatave me Bashkimin Evropian, ndërsa ky klaster përfshin 9 kapituj që prekin fusha themelore për integrimin ekonomik dhe tregun e lirë, përfshirë lëvizjen e lirë të mallrave, punëtorëve, kapitalit, pronësinë intelektuale, shërbimet financiare, mbrojtjen e konsumatorëve etj.

Grupkapitulli i II-të i negociatave përmban:

Kapitulli 1: Lëvizja e lirë e mallrave

Kapitulli 2: Lëvizja e lirë e punëtorëve

Kapitulli 3: E drejta e themelimit dhe liria për të ofruar shërbime

Kapitulli 4: Lëvizja e lirë e kapitalit

Kapitulli 6: Legjislacioni për shoqëritë tregtare

Kapitulli 7: E drejta e pronësisë intelektuale

Kapitulli 8: Politika e konkurrencës

Kapitulli 9: Shërbimet financiare

Kapitulli 28: Mbrojtja e konsumatorit dhe shëndetit

Në tetor të 2024-ës, gjatë kohës që Hungaria mbante presidencën e Bashkimit Evropian, vendi ynë hapi zyrtarisht grupkapitullin e parë dhe më të rëndësishëm, atë të kapitujve themelorë që prekin drejtësinë, administratën dhe shtetin e së drejtës. Ndërsa pak javë më pas, më 17 dhjetor, u çel grupkapitulli i marrëdhënieve me jashtë, me bisedimet për politikën e jashtme dhe sigurinë.

Në lidhje me këtë, ka reaguar dhe kryeministri Edi Rama në një status në rrjetet sociale, ku shkruan:

“MIRËMËNGJES! Me kënaqësinë e madhe, e falënderimin e përulur, për mikpritjen e djeshme të shqiptarëve të Italisë në Milano, si edhe me lajmin e bukur të hapjes sot të një tjetër grupi kapitujsh të negociatave të anëtarësimit me Bashkimin Evropian, ju uroj një ditë të mbarë”

Axhenda:

09:16 – Doorstep me z. Antonio Costa, Presidenti i Këshillit Evropian

18:00 – Hapja e Konferencës Ndërqeveritare 4: Grupkapitulli II – “Tregu i Brendshëm”

19:30 – Konferencë e përbashkët shtypi e Kryeministrit Rama me Radosław Sikorski, Ministër i Punëve të Jashtme të Polonisë (mban Presidencën e Këshillit të BE), dhe Marta Kos, Komisioneri për Fqinjësinë dhe Negociatat për Zgjerimin.

LEXONI GJITHASHTU:

• Rama: Në vitin 2030 Shqipëria do të ketë një kryeministre grua
• Rama: Të hënën hapim një grup të ri kapitujsh me BE