EMRI| Drejtues i një grupi të strukturuar kriminal, SPAK çon për gjykim një person

Prokuroria e Posaçme kundër Korrupsionit dhe Krimit të Organizuar (SPAK) ka dërguar për gjykim Mark Gilaj, i akuzuar për kultivimin e bimëve narkotike dhe drejtimin e një grupi të strukturuar kriminal.

Akuzat përfshijnë veprat penale të “Kultivimi i bimëve narkotike” në bashkëpunim, “Kryerja e veprave penale nga organizata kriminale ose grupi i strukturuar kriminal”, “Grup i strukturuar kriminal”, si dhe “Mbajtja pa leje dhe prodhimi i armëve”.

Nga hetimet ka rezultuar se më datë 25 korrik 2024, gjatë një kontrolli të ushtruar nga policia në fshatin Selcë, në Malësinë e Madhe, u gjetën 11,358 bimë narkotike kanabis të kultivuara në një sipërfaqe prej 6,956 m². Bimët ishin të mbjella në tri parcela, me lartësi 40-100 cm. I pandehuri Mark Gilaj u arrestua në flagrancë.

Gjithashtu, gjatë kontrollit në një kasolle të improvizuar, u sekuestruan një pushkë Model 56, një armë gjahu dhe disa fishekë luftarakë. Hetimet kanë provuar se Gilaj ka ushtruar aktivitetin e kultivimit të bimëve narkotike dhe ka mbajtur armë pa leje, duke konsumuar elementët e veprave penale të ngritura ndaj tij.

LEXONI GJITHASHTU:

• Sekuestrimi i celularit, Apeli i GJKKO-së rrëzon kërkesën e Ajola Xoxës
• “Fshihesha në xhami”- Dëshmia e Daut Lazes, si ndryshoi pamje t’i shpëtonte policisë