Pse Papa Françesku vizitoi Shqipërinë? At Zef Bisha zbulon bisedën me të

At Zef Bisha tregoi në një intervistë për Euronews Albania kujtimet nga takimi me Papa Françeskun gjatë vizitës së tij në Shqipëri më tepër se 10 vjet më parë.

Ai rrëfeu se si Papa i kishte thënë se arsyeja pse kishte zgjedhur Shqipërinë në vizitën e tij të parë si Papë ishte vuajtja që kishte kaluar populli shqiptar.

“Kam pasur fatin të mbaroj formimin si jezuit në Meksikë dhe ishte dëshira ime ta bëja këtë në një kontinent tjetër. Kjo kohë e kaluar atje më ka bërë të kuptoj më mirë Papa Françeskun, të mënyrës së komunikimit me njerëzit, duke qëndruar me më të vegjlit dhe më të largëtit.

“Kur u takuam, dy herë më tha: E di pse e kam zgjedhur Shqipërinë? Se ishte vendi më i largët dhe unë nuk kam dëshirë të shkoj në qendër por te vendet më të largëta dhe te ato vende që kanë vuajtur. Ajo që e kishte prekur ishte si ka mundësi që Shqipëria ka kaluar një vështirësi kaq të madhe në kohën e diktaturës, që të mbyllet kisha dhe të vriten njerëzit e fesë, se di çfarë ka lëvizur në mendjen e atij regjimi”, tregoi prifti.