Haradinaj mesazh Kurtit: Mos e hiq taksën pa njohur Kosovën, në të kundërt mban përgjegjësi

Ish-Kryeministri i Kosovës Ramush Haradinaj i ka dërguar përsëri një mesazh Kryeministrit Albin Kurti për taksën 100% ndaj mallrave serbe e boshnjake. Ai e ka porositur kryetarin e qeverisë që të mos e heqë taksën ndaj Serbisë pa e njohur kjo e fundit Kosovën si shtet të pavarur.

Ish-kreu i qeverisë kosovare e këshillon pasardhësin e tij në këtë detyrë se nëse ndjek rrugën e parë  për kontratën finale për njohje, do ta ketë përkrahjen e tij dhe të Aleancës për Ardhmërinë e Kosovës. Ai shton se çdo veprim i Albin Kurtit jashtë kësaj linje e ngarkon atë me përgjegjësi direkte.

“Albin, Ke ofertu heqjen e taksës, e po të ofrohet kthim në procesin dialogues, tashmë të konsumuar e komprometuar. Mos e heq taksën për rikthim në proces të konsumuar e komprometuar, por oferto për kontratë finale për njohje reciproke në kufijtë ekzistues.
Kosova i ka dakorduar tri të drejta: Asociacionin në bazë të Kushtetutës, të drejta të zgjeruara për komunitetin serb sipas orientimit të Planit të Ahtisarit, dhe status të veçantë për Kishën Ortodokse Serbe sipas Projektligjit për Liritë Fetare.
Oferto heqjen e taksës për Kontratën Finale për njohje në kufijtë ekzistues, jo për rikthim në proces dialogues tashmë të konsumuar e komprometuar.

Nëse shkon rrugës së parë për kontratën finale për njohje, do ta kesh përkrahjen time dhe të Aleancës. Nëse vazhdon me ofertën për kthim në proces të konsumuar e komprometuar, do të të mbajmë përgjëgjës për pasojat”- shkruan Ramush Haradinaj.