Në grup me gjermanët, Kombëtarja minifutbollit surprizon në Europian, kalon në 1/16

Ndërkohë që të gjithë tifozët janë fokusuar te ndeshja e Kombëtares me Serbinë, këto ditë në Moldavi po zhvillohet Kampionati Europian i Minifutbollit “Socca EuroCup 2025”, ku përfaqësuesja jonë ka bërë surprizën duke u futur në 16 skuadrat më të mira të Europës.

Një performancë e shkëlqyer nga Kombëtarja e minifutbollit, e cila i nisi ndeshjet në grup me një barazim 1-1 ndaj Gjeorgjisë, fitoi me Çekinë 2-1 këtë të premte, ndërsa kishte arritur më parë një fitore ndaj Turqisë 3-1 dhe një humbje dinjitoze me Gjermaninë 1-2.

Në një grup të vështirë ku ishte Gjermania, dhe në mungesë të lojtarit kryesor, Kaca, përgjegjësia kryesore ra mbi kapitenin Xhuljan Reçi, i cili udhëhoqi Kombëtaren drejt këtij suksesi të madh në Europian.

Risia e këtij viti ishte se trajneri Irtan Sejko, përveç lojtarëve vendas, kishte grumbulluar për herë të parë edhe shqiptarë nga diaspora, konkretisht tre futbollistë që luajnë në “Baller League” në Gjermani: Steven Kodra, Edison Mazreku dhe Bernard Gllogjani.

Me këto rezultate, Kombëtarja jonë e “Socca 6×6” në minifutboll i mbylli ndeshjet e grupit në vendin e dytë me 7 pikë, duke kaluar në fazën e 1/16-ave, ndërsa nesër në orën 17:00 përballet me Francën në fazën e eleminimit direkt.

Renditja e grupit:

• Gjermania – 12 pikë
• Shqipëria – 7 pikë
• Gjeorgjia – 4 pikë
• Çekia – 3 pikë
• Turqia – 3 pikë

LEXONI GJITHASHTU:

• “Doja të sillja babain nga Brazili”, Sylvinho: Ndaj Serbisë luajmë për fitore
• “Të japim gjithçka në fushë”, Gjimshiti: Gati për Serbinë, kërkojmë vetëm fitore
• FSHF Sunday League/ ATS mund Dajtin dhe fiton titullin kampion